Fundashon pa Konsumidó ta un organisashon independiente ku ta sali na interes di e pueblo kumpradó. E publikashon aki ta konta ku ouspisio di Ministerio di Desaroyo Ekonómiko.
Ya no falta muchu pa un aña eskolar nobo kuminsá. Netamente pa e motibu aki Fundashon pa Konsumidó ke enfoká riba e importansia di kumpra produktonan pa skol na un manera konsiente i sabí. Fundashon pa Konsumidó konhuntamente ku Ministerio di Desaroyo Ekonómiko (MEO), a hasi anotashon di preis na un total di 20 establesimentu, basá riba artíkulonan ku ta nesesario pa nos hóbennan ku ta bai kuminsá un aña eskolar nobo. E meta primordial di e anotashon di preis aki ta pa fasilitá e kompra di mayornan, dunando nan un bista di unda ta kumbiní nan kumpra materialnan pa skol.
Den e periodo di 16 pa 30 di yüli 2025, a bishitá un total di 12 establesimentu i a anotá e preisnan di mas barata optenibel na kada establesimentu. E establesimentunan ku a forma parti di e anotashon di preis aki ta:
Office Stop, La Curaçao Zeelandia, Curaçao Office Supply, Mensing’s Caminada, Señor Barata, Bruna, Office System, Casa Cesar, Building Depot, Home Plus st. Maria, Samsom , Martis Agencies.
Pa fasilitá e proseso di ehekushon, Fundashon pa Konsumidó a skohe e 63 artíkulonan di skol mas usá i kolaboradónan di Ministerio di Desaroyo Ekonómiko (MEO) a anotá e preis mas barata na tur e establesimentunan. Mester enfatisá ku preisnan di artíkulonan pa skol no ta kai bou di un preis regulá pa gobièrnu di Kòrsou, pues kada negoshi ta liber pa pone su mes preis. Den e anotashon di preis aki no por hasi komparashon di artíkulonan, paso mester tene kuenta ku origen, kalidat i marka di kada artíkulo.
Mihó surtí
For di nos anotashon di preis, Mensing’s Caminada i Bruna a resultá e establesimentunan mihó surtí ku 61 artíkulo. Na di dos lugá ku un kantidat di 54 artíkulo, Casa Cesar. Martis Agencies ta na di tres lugá ku un kantidat di 46 artíkulo.
Preisnan variá
Fundashon pa Konsumidó a tuma nota di un kantidat di markanan di artíkulonan pa skol disponibel na e diferente establesimentunan. Tur e variashon di markanan aki ta brinda e posibilidat pa konsumidónan por hasi nan eskoho konsientemente.
Fundashon pa Konsumidó ta brinda mayornan i tur sobra konsumidónan un lista ku tur e establesimentunan, e artíkulonan disponibel i nan preis. Esaki sigur ta hasi e proseso di búskeda di artíkulonan pa skol muchu mas fásil pa tur mayor.
Por risibí e lista di anotashon di preis aki, dor di manda nos un e-mail na info@fundashonpakonsumido.cw. Of primi aki pa download: FPK Back 2 School 2025 final
Pa finalisá, Fundashon pa Konsumidó ke probechá di e oportunidat pa deseá nos muchanan un aña eskolar eksitoso. Un aña den kua disiplina i trabou duru mester ta e base fundamental pa alkansá e meta deseá .
