Fundashon pa Konsumidó ta hasi anotashon di preis na diferente establesimentu pa asina publiká esaki. E meta prinsipal ta pa informá e konsumidó unda tin e mihó surtido di produkto i tambe e mihó preis pa asina e konsumidó por hasi un eskoho responsabel na momento di hasi su kompra.
Despues di a publiká nos anotashon di preis riba karni i fruta i berdura, Fundashon pa Konsumidó ta publiká awe e último parti di nos anotashon di preis pa e luna di òktober.
E anotashon di preis aki ta konsistí di produktonan di alimentashon ku mas nos ta kumpra den supermerkado.
Nos a bishita un kantidat di 15 establesimentu i a hasi anotashon di 137 produkto.
E 15 establesimentunan aki ta: Van den Tweel, Arco Iris, Best Buy, Bon Bini, Boulevard market Place, Centrum Mahaai, Centrum Piscadera, Carrefour, Timmy, Esperamos, Mangusa Rio, Mangusa Hypermarket, Ruyterkade, Vreugdenhil i LunaPark.
E anotashon di preis aki a tuma lugá di 21 te ku 30 di òktober 2024 i manera ta kustumber Fundashon pa Konsumidó a kompará produktonan a base di marka i kontenido.
E supermerkado ku mihó preis riba e makutu pre selektá aki a resultá di ta Centrum Piscadera, na di dos luga Mangusa Hypermarket, Centrum Mahaai i Bon Bini supermarket na di 3 lugá.
E supermerkado mihó surti a resultá di ta Centrum Piscadera.
E makutu pre selektá aki ta basá riba produktonan di alimentashon i ta varia di aros, hariña, bonchi, suku te ku zeta, kòfi, te, lechi i limonada.
Tambe tin produktonan di uso personal manera habon pa baña, pasta di djente, toaya femenino i papel di wc.
Pa limpiesa di kas, Fundashon a anotá preis di entre otro: habon pa laba tayó, desinfektante, blich i produkto pa kita mancha.
Pa fasilitá i pa informá nos konsumidónan mas mihó, Fundashon pa Konsumidó a pone tur e 137 produktonan di nos makutu di supermerkado den un tabèl ya asina kada konsumidó por tin un bista mas amplio na kua supermerkado ta mas kumbiniente pa e hasi su kompranan. Tur interesado ku kier haña kopia di e tabèlnan aki por tuma kontakto ku ofisina di Fundashon pa Konsumidó na telefon: 462-6666 òf via e-mail: info@fundashonpakonsumido.org.
Por wak e tabèlnan tambe riba nos wèpsait: www.fundashonpakonsumido.org.
