Fundashon pa Konsumidó ta hasi anotashon di preis na diferente establesimentu pa asina publiká esaki. E meta prinsipal ta pa informá e konsumidó unda tin e mihó surtido di produkto i tambe e mihó preis pa asina e konsumidó por hasi un eskoho responsabel na momento di hasi su kompra.
Despues di a publiká nos anotashon di preis riba material pa konstrukshon, Fundashon pa Konsumidó ta publiká awe e anotashon di preis riba produktonan ku tin den supermerkado.
E anotashon di preis aki ta konsistí di produktonan di alimentashon ku mas nos ta kumpra den supermerkado.
Nos a bishita un kantidat di 17 establesimentu i a hasi anotashon di 126 produkto.
E 17 establesimentunan aki ta: Van den Tweel, Arco Iris, Best Buy, Bon Bini, Boulevard market Place, Centrum Mahaai, Centrum Piscadera, Carrefour, Timmy, Esperamos, Mangusa Rio, Mangusa Hypermarket, Ruyterkade, Vreugdenhil, Luna Park, LZF I Queens.
E anotashon di preis aki a tuma lugá 30 mei – 7 yüni 2025 i manera ta kustumber Fundashon pa Konsumidó a kompará produktonan a base di marka i kontenido.
E supermerkado ku mihó preis riba e makutu pre selektá aki a resultá di ta Bon Bini supermarket ku 36 produkto, na di dos lugá Mangusa Rio ku 32 produkto i Mangusa Hypermarket na di 3 lugá ku 31 di e 126 produktonan di e makutu pre selektá.
E supermerkado mihó surti a resultá di ta Mangusa Rio ku 104 produkto, na di dos luga Mangusa Hyper ku 102 produkto i na di tres luga Bon Bini supermarket ku 99 produkto.
E makutu pre selektá aki ta basá riba produktonan di alimentashon i ta varia di aros, hariña, bonchi, suku te ku zeta, kòfi, te, lechi i limonada.
Tambe tin produktonan di uso personal manera habon pa baña, pasta di djente, toaya femenino i papel di wc.
Pa limpiesa di kas, Fundashon a anotá preis di entre otro: habon pa laba tayó, desinfektante i blich.
Resultado di e anotashon di preis
Despues di a analisá e lista di anotashon di preis, Fundashon pa Konsumidó por a tuma nota di un diferensia di preis entre supermerkadonan. Por ehèmpel kòfi Nescafe 85 gr, na Bon bini ta kosta cg 6.99 i na Boulevard Market Place esaki ta kosta cg 11.69, tambe por a tuma nota di Quacker Quick cooking 660 gr na Vreugdenhil ta kosta cg 9.96 i na Ruyterkade cg 16.75. Fundashon pa Konsumidó ta konsehá tur konsumidó pa konsulta e lista promé ku nan bai hasi kompra.
Pa fasilitá i pa informá nos konsumidónan mas mihó, Fundashon pa Konsumidó a pone tur e 126 produktonan di nos makutu di supermerkado den un tabèl ya asina kada konsumidó por tin un bista mas amplio na kua supermerkado ta mas kumbiniente pa e hasi su kompranan. Tur interesado ku kier haña kopia di e tabèlnan aki por tuma kontakto ku ofisina di Fundashon pa Konsumidó na telefòn: 462-6666 òf via e-mail: info@fundashonpakonsumido.cw.
Klek aki pa download e tabèlnan: PV superm & minim. levensmiddelen juni 2025 final
