Durante e periodo di 21 te ku 30 di òktober 2024, Fundashon pa Konsumidó a bishitá 15 diferente establesimentu pa anotá preis di un kantidat di 98 produkto den e kategorianan: karni, fruta i berdura. E 15 diferente establesimentunan aki ta: Van den Tweel, Arco Iris, Best Buy, Bon Bini, Boulevard market Place, Centrum Mahaai, Centrum Piscadera, Carre Four, Timmy, Esperamos, Mangusa Rio, Mangusa Hypermarket, Ruyterkade, Vreugdenhil i LunaPark. Meta di e anotashon di preis aki ta pa konsientisá i fasilitá nos konsumidónan den nan proseso di kompra. P’esei Fundashon pa Konsumidó ta brinda un lista di preis ku ta duna e konsumidó un mihó bista di kua produkto ta optenibel na unda, kuantu nan ta kosta na kada establesimentu i tambe e diferensianan di preis di kada produkto na e diferente establesimentunan ariba menshoná.
Centrum Mahaai i Piscadera tin mas produkto di karni, belèg, fruta i berdura na mihó preis
Di akuerdo ku e lista di komparashon di preis ku Fundashon pa Konsumidó a traha, Centrum Mahaai i Centrum Piscadera a resultá e supermerkadonan ku mas produkto na mihó preis. A konstatá ku na ámbos supermerkado ta’tin un kantidat di 27 produkto na mihó preis for di e lista di e 98 produktonan den e makutu pre selektá ku a hasi anotashon di dje. Produktonan ku por haña na mihó preis na e dos filialnan di Centrum ta, ‘Flank steak’, ‘Sirloin steak, Nir di baka, Karni Kabritu (eis), Rabu di baka, Hala di galiña, ‘Schouder ham’, ‘Jonge kaas’, Siboyo kora, Promenton berde, Pera i Apples Golden Dilicious.
Mangusa Rio Canario i Hypermarket a resultá na di dos lugá ku 19 produkto na un preis mas kumbiniente i Esperamos a resultá na di tres lugá ku un kantidat di 18 produkto na un mihó preis.
Centrum Mahaai i Centrum Piscadera ta E supermerkado mihó surtí!
E supermerkado mihó surtí pa lokual ta trata karni, belèg, fruta i berdura a resultá Centrum Mahaai i Centrum Piscadrea. Na e establesimentu aki tabatin 82 produkto for di e total di 98 produkto ku Fundashon pa Konsumidó a anotá preis di dje. Na di dos lugá a resultá Esperamos ku un total di 73 produkto. Bon Bini supermarket ta na di 3 lugá ku un kantidat di 70 produkto.
Tin diferensia grandi di preis
Fundashon pa Konsumidó a tuma nota ku tin un diferensia grandi di preis entre sierto produktonan.
Fundashon pa Konsumidó ta sugirí tur konsumidó pa konsultá e lista di komparashon pa ta na altura di e diferensianan aki tambe. Ta bon pa menshoná ku e diferensianan di preis aki por ta dependé di diferente faktor, entre otro marka di e produktonan, pais prosedente di importashon i kalidat di e produktonan. Fundashon pa Konsumidó ta partisipá ku no a tene kuenta ku e faktornan aki den e komparashon di preis aki.
Kòrda kontrolá kiko bo tin den kashi promé ku bo traha bo lista di kompra
Esaki ta hopi importante pa evitá ku ta kumpra kos i gasta sèn innesesariamente. Fundashon pa Konsumidó ta invitá tur konsumidó pa subi nos página elektróniko, www.fundashonpakonsumido.org òf bishitá nos página di Facebook, Fundashon pa Konsumidó, pa tuma nota di e lista di komparashon di preis di karni.
Tambe por hasi un petishon pa risibí e komparashon di preis via nos adrès elektróniko, info@fundashonpakonsumido.org.
Pa kualke pregunta òf remarke tokante di e komparashon di preis por yama nos via telefòn 462-6666.
