Fundashon pa Konsumidó ku regularidat ta hasi anotashon di preis di fruta i berdura den fruterianan na Kòrsou. Ku e meta pa brinda nos konsumidónan un bista amplio di preisnan riba merkado. Den e periodo di 6 te ku 11 di november nos a bishitá 8 fruteria i anotá preis di un kantidat di 86 produkto. E 8 establesimentunan ku a bishitá ta: Aline Fruit Center, Bo Kunuku, Carrot Export, City Center, Dani’s Fruit Center Weto i Dani’s Fruit Center Schonegevelstraat, Fruteria Los Primo i Fruteria Helen.
Ta bon pa enfatisá ku Fundashon pa Konsumidó durante di nos komparashon di preis no ta tene kuenta ku pais di orígen, marka ni kalidat di produkto.
Dani’s Fruit Center esun ku mas variedat di Fruta i Berdura
Despues di a analisá resultadonan di e anotashon di preis na e diferente Fruterianan ariba menshoná, Fundashon pa Konsumidó a konstatá ku Dani’s Fruit Center na Schonegevelstraat ta e fruteria mihó surti basá riba e 86 produktonan ku a keda anotá den e periodo di 6 te ku 11 di novèmber 2024. Di e 86 produktonan, Dani’s Fruit Center na Schonegevelstraat ta tin un total di 58 produkto den stòk. Fruteria Los Primos i Dani’s Fruit Center Weto ta resultá na di dos lugá ku un kantidat di 57 produkto i Bo Kunuku ta na di tres lugá ku 51 produkto den stòk.
Dani’s Fruit Center schonegevelstraat, e fruteria ku mas produkto na un mihó preis
Resultadonan di e anotashon di preis ta indiká ku Dani’s Fruit Center ku tin mas produkto na un preis mas ekonómiko. Di e 86 produktonan ku Fundashon pa Konsumidó a anotá, Dani’s Fruit Center Schonegevelstraat tabata tin 29 produkto na un preis mas kumbiniente. Dan’s Fruit Center weto ta na di dos lugá ku un kantidat di 28 produkto i Bo Kunuku na di tres lugá ku 25 produkto.
Diferensia di preis
Durante di e anotashon di preis aki nos a konstatá tambe algun diferensianan di Fl.0,35 te ku Fl.6,50 pa kilo. Fundashon pa Konsumidó ta pone énfasis riba algun di e diferensianan aki pa asina duna nos konsumidónan un mihó bista i kumpra mas konsiente.
Un kilo di Dragon Fruit ta kosta na Dani’s Fruit Center Weto i Schonegevelstraat Fl. 20,-. Na Bo Kunuku esaki ta kosta Fl.13,50, kual ta un diferensia di preis di fl.6,50. Pa loke ta trata Gèmber, un kilo ta kosta na City Center Fl. 12,- i na Dani’s Fruit Center Weto i Schonegevelstraat esaki ta kosta Fl.18,- kual ta un diferensia di Fl. 6,-. Tambe nos por a tuma nota di diferensia entre preisnan di Awakati na e diferente Fruterianan.
Un kilo di Awakati ta kosta na Dani’s Fruit Center weto i schonegevelstraat Fl.6,- . Na Fruteria Helen esaki ta kosta Fl. 10.-, kual ta un diferensia di Fl.4,-.
Enfatisando esakinan, Fundashon pa Konsumidó ke para ketu riba e importansia di kome salú i alabes e relevansia di kompra konsiente i responsabel.
Pa mas informashon tokante e anotashon di preis di fruta i berdura por tuma kontakto ku nos na number di telefòn 462-6666 òf e-mail info@fundashonpakonsumido.org. Pa e lista di preis kompletu por subi riba nos wèpsait www.fundashonpakonsumido.org.
