Awendia un Laptop no ta un luho mas, si no esaki a bira un nesesidat pa tantu un hóben komo unadulto.
Mayoria di nos ta hasi uzo di un Laptop sea pa trabou, skol òf pa uso priva. Fundashon pa Konsumidó a tuma nota di e variedat grandi ku tin di Laptop riba nos merkado, p’esei durante etemporada di 3 pa 6 di mei 2025 nos a bishitá 7 establesimentu i a hasi anotashon di preis di e diferente Laptopnan ku tin den nan stòk. E 7 establesimentunan ku nos a bishitá pa hasi e anotashon di preis aki ta: Coshel, OMNI, Multi Tronics, Boolchands, Polytrionica, Better Deals i Tapirama.
Na momento ku bo a tuma e desishon ku bo ta bai hasi kompra di un Laptop nobo, tin diferente faktor ku bo mester tene kuenta kuné. Bo tin di hasi bo mes e pregunta, kiko lo ta e uso i propósito di e Laptop? Por ehèmpel, esaki lo ta pa uso básiko òf pa trabounan mas pisá manera traha video, hasi programashon òf hunga spèl?
Hasiendo bo mes e pregunta aki, bo sa presis kiko ta bo nesesidat i esaki ta buta ku bo por hasi un eskoho mas fásil di kua ta e modèl ku mas ta pas pa bo.
Processor (Intel vs AMD)
E processor ta simplemente e manera ku e Laptop ta prosesá algu. Pues nos por bisa ku e processor ta mané e serebro di e Laptop. Intel core i3, i5, i7 i i9 ta esnan mas popular. Ta rekomendabel pa bo hasi investigashon di esakinan i asina bo tin un mihó idea kua ta fit mas pa bo nesesidat.
Ram (Memoria)
E ram (memoria) tambe ta un faktor hopi importante ku bo tin ku tene kuenta kuné na momento ku bo ta bai kumpra un Laptop. Un ram muchu abou pa e uso ku bo tin pa bo Laptop ta buta ku esaki ta pega òf traha ku un speed abou.
Un Laptop ku un ram di 8GB ta bon pa uso básiko, 16GB ta bon pa trabounan mas pisá manera traha video, 32GB òf mas ta pa uso profeshonal manera hunga spèl òf traha software.
Pantaya
Un pantaya di 13 te ku 14 inch ta hasi e Laptop mas ideal pa bo por move kuné. E Laptop lo no ta ni muchu grandi ni pisá. Un Laptop ku un pantaya mas grandi pues di 15 te ku 17 inch bo por wak mas bentana den e pantaya, e fasilidat aki sigur ta kumbiní na momento ku bo ta hasi uso mas profeshonal di bo Laptop.
Windows i aplikashonnan
Mirando kon sofistiká e aparatonan aki a bira, ta importante pa bo sa kua ta e Windows ideal i tambe e aplikashonnan ku e mester disponé di dje pa asina bo tin un mihó probecho di bo Laptop.
Preis i garantia
E preis ku bo ta paga pa e Laptop mester ta den proporshon ku e kalidat.
Sòru pa bo no haña ménos ku 1 aña di garantia.
Tur e faktornan aki ta brinda bo e posibilidat pa por hasi un eskoho konsientemente. E lista di tur establesimentunan, Laptopnan disponibel i nan preis ta visibel riba nos wèpsait www.fundashonpakonsumido.cw.
Download File ‘Komparashon di Laptop’: KOMPARASHON DI LAPTOP
Esaki ta hasi e proseso di kompará modèl mas fásil i bo tin un mihó bista na unda esaki ta na un preis mas kumbiniente.
