E temporada di fin di aña aki no solamente mester sirbi pa nos reflekshoná i plania pa futuro, si no tambe pa nos aktua i kumpra na un manera responsabel i konsiente. P’esei Fundashon pa Konsumidó konhuntamente ku departamento di Inspekshon Ekonómiko (MEO) a bishitá 15 supermerkado durante e periodo di 4 pa 10 di desèmber, pa asina anotá preis di 128 produkto ku ta kai den nos makutu pre-selektá di Pasku. E produktonan ku nos ta konsiderá spesialidatnan di Pasku. Por ehèmpel: ham i orea, biña, ròm, whiskey, ponche crema, serbes, limonada, chips, preimu, rasenchi, anasa den bleki, soda water etc.
Fundashon pa Konsumidó a hinka e preisnan den un tabèl i a analisá e sifranan pa asin’ei informá nos konsumidónan na unda tin e produktonan aki na e preis di mas kumbiniente. Nos tin ku remarká un biaha mas ku solamente nos ta hasi komparashon di e preis i no di e kalidat i grandura di algun produkto. Por ehèmpel: Ham, kalakuna i galiña pa yena por ta diferente den grandura. Meskos tambe ta konta pa pan di pasku (kerstbrood) i ayaka.
Bon Bini Supermarket, esun ku mas produkto di Pasku na un preis mas kumbiniente!
For di nos análisis di pakete di Pasku, Bon Bini supermarket a sali e supermerkado ku mas tantu produkto na mihó preis. Di e 128 produktonan ku wòrdu anotá, e supermarket aki tin 30produkto na un mihó preis.
E di dos supermarket ku preis mas kumbiniente a resultá Mangusa Hypermarket ku 24 un produkto i e di tres supermarket ku mas mihó preis a resultá di ta Mangusa Supermarket na RioCanario ku 22 produkto.
Bon Bini e supermerkado mihó surti
Di akuerdo ku resultadonan di e análisis di pakete di Pasku ku Fundashon pa Konsumidó a hasi, Bon bini a resultá e supermerkado mihó surti ku 112 produkto for di e pakete di 128 produkto. E di dos supermerkado a sali Mangusa Hypermarket ku 102 produkto, siguí pa MangusaSupermarket na Rio Canario ku 96 produkto.
Diferensia di preis
For di e resultadonan di e komparashon di preis nos por mira un diferensia di preis astronómiko den e kategoria di alkohòl i tambe otro produktonan. Diferensianan di preis te ku un máksimo di fl. 49,00. Pa e motibu aki Fundashon pa Konsumidó i Ministerio di Desaroyo Ekonómiko ke pa nos konsumidónan ta aun mas konsiente di e diferente preisnan riba merkado, prinsipalmente den e temporada festivo aki.
Gasta bo plaka di un manera responsabel, tene kuenta ku bo presupuesto i konsulta e lista di komparashon di preis ku FPK i MEO ta brinda. Finalmente nos ta deseá tur nos konsumidónan un felis Pasku i un próspero aña 2025. Kòrda semper ku nos komportashon finansiero den luna di desèmber lo definí kon ‘largu’ nos luna di yanüari lo ta.
