Nos ta den e temporada ku nos por spera mal tempu i ta p’esei nos mester ta prepará. Hopi awa seru i bientu fuerte por okashoná daño na bo kas. Den e kuadro aki Fundashon pa Konsumidó a hasi anotashon di preis riba materialnan pa konstrukshon. Nos ta rekomendá tur konsumidó ku tin ku hasi reparashon na nan dak òf kurpa di kas, pa konsultá e lista di preis pa por haña un mihó bista di e preisnan di diferente materialnan pa konstrukshon i hasi nan kompra di un forma konsiente.
Fundashon pa Konsumidó a bishita 6 diferente establesimentu pa hasi anotashon di preis di 135 material pa konstrukshon durante di 20 di mei pa 28 di mei 2025. E establesimentunan kaminda a hasi e anotashon di preis ta Kooyman Group, Gomez Enterprises, Ferreteria Schèrpènè, Dijtham , Building Depot, Staal Antillen.
For di e anotashon di preis ku nos a hasi riba materialnan di konstrukshon a resultá ku e establesimentu ku tin mas material di konstrukshon den nan stòk ta Building Depot ku 104 di e 135 materialnan i Building Depot mes a resultá di tin mayoria di e materialnan di konstrukshon na un mihó preis, den e kaso aki 70 di e 135 materialnan di konstrukshon ku nos a skohe.
Fundashon pa Konsumidó ta rekomendá pa no warda te na último momentu pa hasi trabou di reparashon. Klaba tur loke ku ta lòs i tapa tur buraku na kurpa di e kas. Sòru pa bo dak i tur bentana ta sigurá. Limpia bo kurá pa evitá ku tin ophetonan ku por bula i kousa mas peliger. Kòrda tene kuenta ku e lista di preis riba nos wèpsait pa promé ku bo bai hasi bo kompra bo por traha un presupuesto, hasi bo propio komparashon i hasi bo kalkulashon di forma responsabel.
Den e temporada aki tambe ta sumamente importante pa bo keda pendiente, kuida bo mes i otro nan. Mantené bo mes bon informá pa asina bo sa kon ta e mihó manera pa bo prepará. Riba nos wèpsait www.fundashonpakonsumido.cw tin informashon dirigí riba e preparashon pa kalamidat pa asina abo por prepará di forma konsiente.
Pa kualkier pregunta òf mas informashon, semper por tuma kontakto ku Fundashon pa Konsumidó na telefòn 4626666 òf e-mail nos na info@fundashonpakonsumido.cw.
Klek aki pa download e lista di anotashon di preis di material pa konstrukshon: Prijsvergelijking bouw mei 2025 final
