[vc_row][vc_column][vc_column_text]KOMUNIKADO DI PRENSA
Na : Tur medionan di komunikashon
Di : Fundashon pa Konsumidó
Fecha : 27 di òktober 2016
Tópiko : Anotashon di preis Tayer di outo
Fundashon pa Konsumidó konstantemente ta publiká komparashonnan di preis di entre otro makutu básiko, karni, fruta i berdura, produktonan di botika etc. E biaha aki Fundashon pa Konsumidó ta trese un anotashon di preis di tayer di outo. Den e periodo di 6 pa 16 di sèptèmber 2016 Fundashon pa Konsumidó a bishitá 10 establesimentu spesialisá riba e produkto aki, di kual 7 a koperá i forma parti di e anotashon di preis aki. E establesimentunan aki ta: Japan Tires, Napa, Hot Wheels Tire Center, Imperial Sales & Services N.V., Western Tires, Tire Sale & services, Señor Barata & Super Barata. Un danki na kada un di nan pa nan koperashon den esaki.
Ku e anotashon di preis aki Fundashon pa Konsumidó ke fasilitá e proseso di búskeda òf kompra, brindando nos konsumidónan un lista ku ta kontené informashon balioso basá riba markanan mas bendí riba merkado, ku nan respektivo preis i informashon adishonal.
Markanan mas bendí
Mirando e variashon i kantidat amplio di markanan di tayer riba nos merkado, Fundashon pa Konsumidó a anotá preisnan di e markanan i saisnan mas bendí na kada establesimentu. Segun resultadonan di nos anotashon por konkluí ku e markanan mas bendí ta Westlake, Tork, Sailun, Marshall, Bridgestone, Powertrack, Constancy, Hifly, Mastercraft, Goodride, Sumitomo HTR 200, Minerva, Keter, Durun, Winrun i Yonking.
Preis i sais di tayer
Nos por a tuma nota ku tin algun establesimentu ku un variashon amplio di preis i sais di tayer. Kuminsando for di fl. 70.72 pa un sais150/80 R13 te fl. 545.90 pa un sais 265/70 R16. Tambe tin establesimentunan ku ta konsentrá mas riba algun marka òf saisnan spesífiko so. Pues, tene esaki na kuenta. Konsultá e lista di anotashon pa bo por keda bon informá kua ta e marka i sais mas bendí, segun bo outo i tambe bo preferensia.
Diferensia servisio entre establesimentu
Fundashon pa Konsumidó a tuma nota di e diferensia di servisio entre e diferente establesimentunan ku a wòrdu bishitá. Algun ehèmpel: Na kompra di un tayer di outo na Japan Tires, Napa i Western Tires, bo tayer ta wòrdu instalá i balansá grátis. Imperial Sales & Services N.V. i Tire Sales & Services ta brinda konsumidónan e servisio di instalá i balansá grátis, na kompra di mínimo 2 tayer. Hot Wheels Tire Center tambe ta duna servisio di instalá i balansá. Ademas di esaki, konsumidónan ta risibí 10% di rebaho na kompra di mínimo 2 tayer. Tambe tin algun establesimentu ku no ta duna niun klase di servisio èkstra. Tene kuenta ku esaki tambe.
Fundashon pa Konsumidó ta konsehá tur konsumidó pa konsulta e lista di anotashon di preis i evaluá promé kiko bo ta buska i kiko bo ta spera di e bendedó. Alabes nos ke rekordá nos konsumidónan shofùr ku un komportashon sano i konsiente riba nos kareteranan por determiná e durabilidat di nos tayernan. Pa mas informashon tokante e lista di anotashon aki por tuma kontakto ku Fundashon pa Konsumidó na number di telefòn 462-6666 òf por manda un meil na info@fundashonpakonsumido.org. Pa e anotashon aki òf kualke otro anotashon òf komparashon di preis, por subi nos wèpsait www.fundashonpakonsumido.org. Fundashon pa Konsumidó – pa empoderá i konsientisá nos konsumidónan.
komparashon-di-preis-tayer-di-outo[/vc_column_text][/vc_column][/vc_row]
