Fundashon pa Konsumidó ku Enkuesta tokante Seguro di entiero i funerario
Un di e tareanan di Fundashon pa Konsumidó ta pa hasi investigashon di merkado. Investigashon ta un parti importante di nos trabounan. Un di nos metanan ta pa informá komunidat ku informashon konkreto i basá riba echo. E investigashonnan ku mas ta resaltá ta nos investigashon tokante komparashon di preis di produkto i servisio.
Banda di e komparashonnan di preis kustumbrá, nos ta hasi investigashon den otro sektornan tambe. Algun di e investigashonnan ku nos a hasi den pasado ta investigashon di servisio di ántes TDS, UTS , investigashon di nos transporte públiko i servisionan bankario. E último investigashon ku nos a hasi nos a midi kon bon informá e konsumidó ta di servisionan ku bankonan ta duna ora di por ehèmpel hasi fiansa, hipotek, habri un kuenta na banko.
Tambe nos a hasi un investigashon pa yega na un maneho di energia responsabel, kua konklushon i rapòrt nos a entrega na gobièrnu tambe. Meta di esaki ta pa mehora maneho òf yega na un maneho nobo na bienestar di e konsumidó.
Aktualmente nos ta ehekutando un investigashon den e área di seguro di entiero i funerario. Pa esaki nos tin mester di yudansa di abo komo konsumidó ku a eksperensia e servisio di seguro di entiero i funerario. Di e forma aki nos por yega na dato konkreto pa informá komunidat.
Si bo ta forma parti di nos kontaktonan di e-mail, lo bo por bai risibí un ‘link’ pa asina partisipá na e enkuesta aki.
Nos ta invitá tur konsumidó ku a eksperensiá servisio di seguro di entiero i funerario pa bishita nos página di Face Book Fundashon pa Konsumidó pa partisipá na e enkuesta aki i asina yuda nos yega na informashon verídiko na bienestar di e konsumidó. Tambe bo por manda nos un mail na info@fundashonpakonsumido.org pa por risibí e link pa yena e enkuesta aki.
For di awor masha danki pa kontribuí ku e proyekto aki. Si bo ta deseá mas informashon tokante e enkuesta aki por tuma kontakto ku Fundashon pa Konsumidó su departamento di komunikashon na 4626666.
