Djabièrnè último 15 di mart tabata dia internashonal di konsumidó. Riba e fecha aki Fundashon pa Konsumidó a para ketu riba e derechinan di e konsumidó i e desaroyonan rondó di esaki na Kòrsou. Tambe a pone atenshon riba e tema global stipulá pa Consumers International e aña aki kual ta Futuro AI Responsabel i Hustu pa e Konsumidó. Nos ta gradisí medionan di komunikashon pa a duna nos e oportunidat di informá e konsumidó di un forma amplio i duna e atenshon spesial na e dia aki.
Despues di mèrdia e kos a kulminá den sala di ouditorio di Universidat di Kòrsou kaminda nos oradónan a elaborá riba e tópiko Futuro AI Responsabel i Hustu pa e Konsumidó di forma tremendo. Ingeniero Nelson Mambre a splika Inteligensia Artifisial di un forma simpel pues “ na plaka chikí”. Ing.Mambre a splika e oudiensia ku no mester di tin miedu di e desaroyo aki. Mester mira Inteligensia Artifisial komo un medio pa hasi nos bida mas fásil sin pèrdè for di bista ku mester sòru di hasi uzo di dje di forma responsabel. Dr. Guido Rooijer a konsentrá riba e parti di regulashonnan pa uzo di AI ku a keda introdusí den un tratado na Europa i kon nos por hasi bon uzo di e echo ku komo pais den reino nos tambe por hasi uzo di e tratado aki pa regulá uzo di Kòrsou tambe. Nos por wak bek riba un dia eksitoso kaminda nos a risibí hopi informashon balioso. Fundashon pa Konsumidó lo sòru di hasi bon uzo di e informashonnan aki pa sigui konsientisá e konsumidó pa un Futuro AI Responsabel i hustu pa Konsumidó. Sigui nos pa asina bo keda bon na altura di e diferente aktividatnan benidero.
Danki na tur konsumidó ku a asistí i tur e bon reakshonnan ku nos a risibí di esnan ku a sigui nos transmishon bibu via di Radio Hoyer 1.
