Fundashon pa Konsumidó ta den full preparashon pa organisá un tremendo seminario tokante “Fair and Responsible AI for consumers”. Tur persona i instansia konserní ta keda kordialmente invitá pa partisipá. Durante di e seminario aki lo interkambiá informashon i asina huntu nos desaroyá i krese di un forma hustu i sólido den e aria aki.
AI a hasi un impakto enorme den e mundu digital. Diferente konsumidó ya ta hasiendo uzo di AI den nan bida diario. E teknologia aki ya tin un influensia grandi riba nos manera di traha, krea, komuniká, kompilá informashon i hopi mas.
E bentaha i desbentaha di AI ta amplio. Uzando esaki korektamente, AI por mehora e dunamentu di servisio na konsumidónan i improvisá kontakto entre kompanianan i e konsumidó. Pero ku esaki e por trese hopi preokupashon rondó di e parti di privasidat i seguridat pa e konsumidó.
Mirando e kresementu rápido den e mundu di AI nos mester aktua rápido pa asina sigurá un maneho di AI responsabel i hustu pa e konsumidó.
P’esei Fundashon pa Konsumidó a mira e gran importansia pa organisá e seminario aki pa risibí mas konosementu riba e tópiko aki i asina por kompartí esaki ku e konsumidó.
Durante di e seminario nos ta bai atendé tópikonan manera “Kiko nobo tin rondó di AI, E manera mas stratégiko pa atendé ku AI,Lei di protekshon kontra di AI ta nesesario, sektornan ku AI lo impaktá, preokupashonnan rondó di AI, Fayonan di AI i kon pa atendé ku nan, maneho responsabel di data pa uso di AI”i hopi mas.
E meta ta tambe pa por rekoudá e fondonan nesesario pa organisá charlanan informativo pa e konsumidó den futuro.
E seminario aki lo tuma lugá dia 17 di òktober 2024 na Renaissance Windcreek Resort Curacao kaminda ekspertonan den e aria aki lo brinda konosementu riba e tópiko importante aki. Diferente ta e personanan ku ya a registrá kaba.
Abo tambe ke registrá? Subi nos página di Facebook, tambe por tuma kontakto ku nos via di nos e-mail info@fundashonpapakonsumido.org òf yama 4626666 pa mas informashon.
