Manera ta konosí dia 15 di mart ta Dia Internashonal di Konsumidó. Riba e fecha aki ta para ketu riba e importansia di respetá e derechi di e konsumidó . Den kuadro di esaki nos di Fundashon pa Konsumidó ta mustra e importansia pa sigui empoderá e konsumidó pa e mes por sali pa su derechinan. Riba e fecha aki tambe ta para ketu riba e diferente aspektonan importante ku mester tene kuenta kuné pa protehá e konsumidó. Manera ta e kustumber nos ta trese konsientisashon riba e tema global stipulá pa Consumers International.
E tema di e aña aki ta “Un futuro ku AI hustu i responsabel pa e konsumidó”. Nos ta laga e tema di aña aki biba bou di nos konsumidónan i asina kumpli ku nos tarea di eduká i konsientisá e konsumidó pa medio di kampañanan di konsientisashon. E sistema di AI (Inteligensia Artifisial) ta un tiki kompliká i poko deskonosí ainda pero e ta keda algu hopi importante pa papia di dje mirando kon lihé e desaroyo aki ta kana.
Riba e dia aki nos tin nos media tour manera kustumbrá. Por check nos na e diferente medionan di komunikashon pa asina risibí tur informashon relashoná ku e tópiko i e diferente aktividatnan ku nos ta bai tin durante di e aña aki. Pa trai mèrdia e kos ta bai kulminá na Universidat di Kòrsou kaminda nos lo bai tene un evento ku nos a yama ‘Open Mic Topic Session’. Tur kos lo kuminsá 2or di mèrdia i lo terminá 4or di atardi. Durante di e seshon aki nos lo bai tin 2 orador ku ta bai splika kiko ta Inteligensia Artifisial i kon esaki por tin influensia riba e komportashon di e konsumidó. Guido Rooijer lo toka e tema Kumpra Konsiente i Nelson Mambre lo splika nos AI na Plaka Chikí. Mas ku klaro e intenshon ta pa e konsumidó tambe por partisipá aktivamente durante di esaki ta p’esei e nòmber di e evento ta ‘Open Mic Topic Session’. Fundashon pa Konsumidó huntu ku Universidat di Kòrsou ta invitá pueblo di Kòrsou kompletu pa asistí na Open Mic Topic Session aki. E evento aki ta grátis i e idioma ta Papiamentu! Esaki ta un tremendo oportunidat pa kompartí ku nos i siña mas di e tema Inteligensia Artifisial. Tur ku ta interesá pa partisipá por registrá na Fundashon pa Konsumidó via di nos e-mail info@fundashonpakonsumido.org òf via telefòn 462-6666 pa asina nos por tin un bista di e kantidat di persona mirando ku lugá ta limitá.
