Accordion Content

Introdukshon
Na mart 2010 Fundashon pa Konsumidó a duna enkargo na e büró Curconsult pa hasi un enkuesta serka nos konsumidónan tokante konosementu, eksperensia i persepshon di e konsumidó tokante su banko titulá : “Over Banken”. Pa kompletá e investigashon, Fundashon pa Konsumidó a laga hasi un Mystery Shopping pa por a kompará resultadonan di e enkuesta ku práktika di bida real.

Enkuesta “Over Banken”
E último tempu Fundashon pa Konsumidó a wòrdu aserká ku preguntanan tokante di e komishon- i interesnan haltu ku bankonan ta kobra riba un fiansa. Pa e motibu aki Fundashon pa Konsumidó a hasi un estudio riba e persepshon i eksperensia di e kliente ku su banko. Un total di 800 persona a wòrdu entrevistá ku preguntanan tokante nan kuenta koriente i di spar, motibunan pa spar òf fia i nan konosementu di e gastunan relashoná ku un kuenta bankario.

Resultadonan
Di tur e entrevistadonan, kuater di sinku persona tin un kuenta di banko. Di e personanan ku un kuenta di spar, dos di kada sinku persona ta spar regularmente dor di pasa sèn tur luna riba nan kuenta di spar. Mitar di e kuestionadonan sa kuantu interes e ta haña riba su kuenta di spar.

E pregunta kua ta e motibunan pa hasi fiansa a wòrdu relashoná ku un meta di e fiansa. Akinan nos ta mira ku e konsumidó ta ménos inkliná pa hasi un fiansa pa gastunan di konsumo. E motibu i meta pa fia ta mas pa invershonnan duradero manera un kas òf outo (tabèl 1)

E kontestanan riba preguntanan tokante konosementu di kondishonnan di hasi fiansa tabata mas diverso. 55% di e kuestionadonan ta informá su mes tokante e kondishonnan di fiansa na momentu di hasi un fiansa konvenshonal. Mayoria ta haña e suma ku mester paga pa luna mas importante. Kosnan manera APR (interes anual), límite di krédito i porsentahe di interes riba credit card i límite di krédito ta ménos konosí.

Di otro banda e 35% di e kuestionadonan ku tin fiansa ta bisa ku ta bon pa ta na altura di e kondishonnan di fiansa i di e porsentahenan di interes. Tambe nan eksperensia ku wòrdu bon informá dor di banko. Remarkabel ta ku 50% di e kuestionadonan lo no hasi un fiansa serka e mesun banko un próksimo biaha.

Por lo general e kliente ta satisfecho ku su banko: e ta eksperensiá, e trato i serviso ta kualifiká i e manera ku ta manehá sèn komo un bon banko. Komentarionan krítiko ta mas den e esfera di tempu ku mester warda den rei i tokante desaprobashon di fiansa.

Mystery Shopping
Pa kompará e resultadonan di e enkuesta Fundashon pa Konsumidó a laga hasi un seri di bishita na bankonan lokal. E intenshon di e “Mystery Shopping” tabata pa kontrolá si di bèrdat e informashon i splikashon duná dor di banko tokante un fiansa ta korekto i transparente manera e konsumidó ta eksperensiá. Ya ku ta difisíl pa por duna un kualifikashon si bo no sa tur loke mester wòrdu bisá na e konsumidó.

E servisio di mayoria di e bankonan por wòrdu kualifiká komo bon: no mester a warda hopi pa yega na bùrt, empleadonan tabata amabel, korekto, interesá i a tuma sufisiente tempu pa kontesta preguntanan di nos mystery-shoppers. Kasi tur banko a pensa riba privasidat di e kliente pa hasi un kòmbersashon konfidensial.

E informashon duná sí ta varia hopi di banko pa banko. Hopi banko ta duna informashon oral tokante e fiansa, e kondishonnan, e durashon i e pago mensual. E kalkulo di e fiansa máksimo ta diferensiá hopi entre e bankonan. Unu ta konta hür den gastunan mensual, otro ta laga e fiansa dependé riba e añanan ku e kliente tin ta traha. Por lo general e mystery shopper por a fia un tersera parti di su salario.

E empleadonan di banko kasi na tur okashon a menshoná e interes riba e fiansa. Den ningún okashon esaki tabata igual na e APK (Anual Percentage Rate). Na momentu ku a puntra tokante esaki a sali na kla ku hopi di e empleadonan no ta konosé òf no sa eksakto kiko e terminologia aki ta nifiká. Preguntanan tokante klóusulanan di bùt i pago avansá ta wòrdu bon kontestá. Sinembargo na niun di e kòmbersashonnan informashon a wòrdu duná tokante kostonan adishonal pa ku e fiansa manera komishon di fiansa, seguro òf kubrimentu di rísiko, O.B. ku mester wòrdu pagá, eventual kosto di seyo.  Den práktika e gastunan aki ta relativamente haltu i si nan wòrdu inkluí den e APR nos ta yega na un porsentahe di interes efektivo mas haltu ku esun ku banko ta usa. Si tur e gastunan adishonal wòrdu inkluí den e APR e interes riba un fiansa personal lo ta entre 16% pa 30%. Pa un fiansa di outo e APR lo varia entre 7,5% i 11% ku un tòp di 16% segun nos investigadornan.

Ningún di e empleadonan di banko a duna informashon por eskrito tokante en fiansa òf su kondishonnan.  Foyetonan ku informashon, ku mayoria biaha ta eksistí, tampoko no a wòrdu duná na e kliente.

Na ningún banko ta posibel pa lesa e kontrato di fiansa adelantá ni tampoko haña un konsepto di e kontrato pa bai kas i lesa trankil. Loke ta butá riba e kontrato, e kliente ta wòrdu fòrsá pa firma sin haña oportunidat sufisiente di lesa tur e kondishonnan, ku sigur ta skirbí ku  lèternan chikí.

Pa un vershon kompletu di e estudio i investigashon,  por tuma kontakto ku Fundashon Pa Konsumidó

Introdukshon
Na aña 2006 Fundashon pa Konsumidó a laga hasi un investigashon ku e meta pa haña sufisiente informashon verídiko riba deseo- i nesesidatnan di usarionan (postensial) di transporte públiko, ku e meta pa suministrá gobièrnu ku konsehonan pa trese kambionan i mehorashonnan nesesario den e sistema di transporte públiko aki na Kòrsou.

E pregunta kardinal den e investigashon aki tabata: Kua ta e deseo- i nesesidatnan di e usario (potensial) di transporte públiko na Kòrsou en relashon ku aksesibilidad, seguridad, kalidad di e orario di rutanan, suministro di informashon, kalidad di e medio di transporte, tarífanan i kòntròl?

Pa mas informashon tokante e investigashon aki, por download e dokumentonan riba e página aki.