Falta poko pa nos yega e kambio tan sperá. Dia 31 di Mart 2025 ta bai ta un dia históriko pa Kòrsou i St.Maarten.
E dia aki nos florin karibense lo wòrdu introdusí. Ya nos por a mira i skucha diferente informashon sumamente importante ta bai rònt riba media sosial, radio emisoranan i tambe na nos televishonnan lokal. Fundashon pa Konsumidó tambe a forma parti di duna informashon pa asina abo por keda informá di tur e kambionan rondó di nos florin karibense.
E instansianan finansiero tin un trabou grandi pa asina yuda hasi e kambio aki di un forma sigur pa nos tur.
Fundashon pa Konsumidó a wòrdu aserká pa algun konsumidó ku tin un preokupashon basa riba e biyetenan nobo ku lo tin di bai sali for di e bankomátikonan di MCB.
Ta asina ku MCB a saka un informashon ku ta indiká ku na momento ku e kambio pa florin karibense wòrdu hasi i bo ke bai lanta sèn for di un bankomátiko, bo tin e opshon pa saka sea un biyete di cg20 òf cg100.
Esaki a buta ku mes ora Fundashon pa Konsumidó a aserká MCB, pa asina nos haña informashon rondó di e preokupashon aki.
MCB a splika nos ku por lo pronto ta e biyete di Cg20 i Cg100 por wòrdu lantá. MCB a buta tur e informashonnan importante aki riba nan media sosial i wèpsait, pues ta importante pa tur konsumidó i sigur esnan ku ta kliente na MCB subi riba nan páginanan i konsientisá nan mes di tur e avisonan importante ku tin.
Fundashon pa Konsumidó ta sugerí tur konsumidó pa aserka e banko ku nan ta kliente di dje i asina tuma nota di tur e avisonan importante ku tin rondó di e kambio pa e florin karibense ku alfinal nos tur tin di bai eksperensiá.
Nos ke deseá tur instansia finansiero tur klase di éksito ku e trabou grandi ku nan tin.
Laga nos tur keda trankil, nos kambio pa florin karibense ta den man di ekspertonan i Fundashon pa Konsumidó tin sigur ku tur kos lo kana bon den e transishon aki.
Fundashon pa Konsumidó 4626666, e-mail info@fundashonpakonsumido.cw
