Despues di a publiká nos komparashonnan di preis di karni i fruta i berdura, Fundashon pa Konsumidó ta publiká awe e último parti di nos komparashon di preis pa loke ta trata luna di sèptèmber. E komparashon di preis aki ta konsistí di produktonan di sobrá kategorianan ku mas nos ta kumpra den supermerkado. Un total di 110 produkto a keda selektá, anotá i kompará na un kantidat di 22 establesimentu den e periodo di 16 di sèptèmber pa 27 di sèptèmber 2016. E produktonan aki ta varia for di aros, hariña, bonchi, suku, zeta dushi,kòfi, te, lechi, limonada etc. Tambe tin produktonan di uso personal manera habon pa baña, pasta di djente, toaya femenino i papel di wc.
Pa medio di e komparashon di preis aki, konsumidónan por tin un bista mas amplio kua supermerkado ta mas kumbiniente pa hasi nan kompra responsabelmente.
Bon Bini supermarket: e supermarket ku mihó preis.
A base di e resultadonan di nos komparashon di preis, Bon Bini supermarket ta resaltá komo e supermerkado ku mas tantu produkto na mihó preis pa loke ta trata e produktonan ku a keda selektá. For di e lista ku 110 produkto, Bon Bini supermarket tabatin un kantidat di 30 produkto na un preis mas abou. Mangusa Rio Canario ta na di dos lugá ku un kantidat di 19 produkto mas barata i na di tres lugá Esperamos supermarket ku un kantidat di 18 produkto.
Mangusa Hypermarket ta mihó surtí
Ku un kantidat di 94 produkto for di e 110 produktonan selektá, Mangusa Hypermarket tabata e supermerkado mihó surtí na momentu ku Fundashon pa Konsumidó a pasa anotá preis. Despues di Mangusa Hypermarket, Esperamos supermarket ta na e di dos lugá ku un kantidat di 91 produkto for di e lista di produkto selektá. E di tres lugá ta bai pa Mangua Rio Canario ku 90 produkto.
Diferensia di preis remarkabel
Fundashon pa Konsumidó a konstatá diferensianan di preis grandi durante di e komparashon di preis den supermerkadonan. E produkto ku un diferensia di preis mas grandi na e supermerkadonan ta pasta di djente. E pasta di djente marka Dr. Tichenor’s ta kosta na Colon supermarket fl. 6.50 i na Arco Iris supermarket e mesun pasta di djente ta kosta fl. 14.50. Esaki ta un diferensia di fl. 8.00.
Desinfektante marka Tempo di 3.79 liter ta kosta na Mangusa Rio Canario i Hypermarket fl. 6.78. Sinembargo na supermarket 2000 i minimarket St. Maria esaki ta kosta fl. 11.50. Esaki ta un diferensia di preis di fl.4.72. Un otro produkto ku tambe tin un diferensia di preis grandi den e diferente supermerkadonan ta papel di wc di e marka Swave. Un paki di Swave ku un kantidat di 12 ròl aden ta kosta na Arco Iris supermarket fl. 7.50. Na Bonam minimarket e mesun papel di wc aki ta kosta fl. 14.05. Esaki ta un diferensia di fl. 6.55
Ta bon pa menshoná ku Fundashon pa Konsumidó no a tene kuenta ku kalidat òf pais di orígen di e produktonan ku ta keda preselektá.
Fundashon pa Konsumidó ta konsehá kada konsumidó pa hasi nan kompra na un manera konsiente i responsabel. Pa hasi esaki posibel, Fundashon pa Konsumidó ta brinda e lista di komparashon di preis aki riba nos wèpsait www.fundashonpakonsumido.org. Pa kualke informashon por tuma kontakto ku Fundashon pa Konsumidó na number di telefòn 462-666 òf via e-mail info@fundashonpakonsumido.org
