Den e periodo di 10 te ku 20 di mart 2017, Fundashon pa Konsumidó a bishita 22 establesimentu aki na Kòrsou i a anotá preis di 81 produkto di karni i bèrdura. A anotá preis na e siguiente establesimentunan: Supermarket 2000, van der Tweel, Arco Iris, Arti’s, Best Buy, Bon Bini, Boulevard Market Place, Centrum Mahaai i Piscadera, Colon, Esperamos, Exito, Mangusa Rio Canario i Hypermarket, Ruyterkade, Vreugdenhil, LZF, LI’s, Bonam, Queens, Luna Park i Sta. Maria.
Ku e komparashon di preis aki Fundashon pa Konsumidó ta fasilitá konsumidónan den nan proseso pa un kompra konsiente. Ta bon pa menshoná ku durante di e komparashon di preis aki no a tene kuenta ku pais di orígen, marka ni kalidat di produkto.
Esperamos supermarket esun mihó surti
Ku un total di 66 produkto di e 81 produktonan ku Fundashon pa Konsumidó a anotá,
Esperamos supermarket ta resultá esun mas mihó surtí. Centrum Piscadera, Mahaai i Mangusa Rio Canario i Hypermarket ta resultá na di dos lugá ku un kantidat di 63 produkto. Na di 3 lugá ku un kantidat di 61 un produkto a resultá Bon Bini supermarket.
Centrum Mahaai i Piscadera tin mas produkto di karni, bèrdura i belèg na mihó preis
Resultadonan di e komparashon di preis ta mustra ku Centrum Mahaai i Piscadera tin mas produkto di karni, bèrdura i belèg na un mihó preis. Di e 81 produkto ku Fundashon pa Konsumidó a anotá, Centrum Mahaai tin 19 i Centrum Piscadera 18 produkto na un preis mas ekonómiko.
Diferensia grandi di preis
Durante di e anotashon di preis aki, Fundashon pa Konsumidó a konstatá un diferensia grandi di preis entre algun sorto di karni. Por ehèmpel, un kilo di runderlappen ta kosta na Arco Iris supermarket fl. 14.25 i na supermarket 2000 esaki ta kosta fl. 24.35, kual ta un diferensia di fl. 10.10. Un kilo di karni di sòpi ku wesu ta kosta na Vreugdenhil supermarket fl. 6.25 i na Ruyterkade esaki ta kosta fl. 17.95, kual ta fl. 11.70 di diferensia. Tambe nos por a tuma nota di un diferensia di preis pa loke ta trata flanksteak. Un kilo di flanksteak ta kosta na Centrum Piscadera i Mahaai fl. 11.95. Na supermarket 2000 esaki ta kosta fl. 21.50, kual ta un diferensia di fl. 9.55.
Den e kategoria di belèg tambe a konstatá diferensia di preis grandi. Dos di e produktonan ku un diferensia di preis mas grandi ta Jonge Kaas i Schouderham. Un kilo di Jonge Kaas ta kosta na Esperamos Supermarket fl. 10.70 i na Luna Park esaki ta kosta fl. 23.95, kual ta un diferensia di fl. 13.25. Un kilo di Schouderham di slais ta kosta na Centrum Mahaai fl. 9.21 i na Bonam minimarket esaki ta kosta fl. 25.00. Entre e dos establesimentunan aki tin un diferensia di preis di fl. 15.79.
Ta bon pa menshoná ku e diferensia di preis por ta mará na diferente faktor. Por ehèmpel pais di orígen, kalidat di produkto, marka etc. P’esei Fundashon pa Konsumidó ta konsehá tur konsumidó pa traha nan lista i kumpra produktonan di karni, bèrdura i belèg kaminda ta kumbiní. Esaki ta hopi importante pa evitá ku ta kumpra kos i gasta sèn innesesariamente.
Komo konsumidó, bo tin derechi di eskoho, pues ta krítiko i kumpra semper konsiente i responsabel.
Pa mas informashon tokante di komparashon di preis di produktonan di karni, bèrdura i belèg tuma kontakto ku Fundashon pa Konsumidó na telefòn 462-6666 òf e-mail info@fundashonpakonsumido.org. Tambe por mira e lista di komparashon di preis riba e wèpsait www.fundashonpakonsumido.org.
