Fundashon pa konsumidó den koperashon ku Ministerio di Desaroyo Ekonómiko (MEO) ta hasi komparashon di preis i informá e konsumidó na unda ta kumbiní pa kumpra produktonan spesial pa temporada di siman santu manera; tuna den bleki, salmou den bleki, sardines den bleki, oester den bleki, piská, bokkel, bakiou, mix seafood na paki, berdura den bleki, bonchi di paki i bleki òf glas i webu di pasku.
E anotashon di preis aki a tuma lugá den e temporada di 11 pa 13 di mart 2024. Nos a kompará preis di 109 diferente tipo di kuminda di laman na 15 establesimentu. E supermerkadonan kaminda e anotashon di preis a tuma luga ta Arco Iris , Arti’s , Best Buy, Bon Bini Supermarket, Boulevard Market Place, Centrum Mahaai i Piscadera, Carrefour, Esperamos Supermarket, Timmy, Mangusa Rio i Hypermarket , Vreugdenhil, Minimarket Luna Park i New Plaza/ De Ruyterkade. Apesar di e diferensia grandi den preis nos por a saka e tòp 3 nan manera ta kustumbrá di e supermerkadonan mihó surtí i e supermerkado ku e mihó preis den e kategoria aki. Pa mas informashon di e preisnan di e diferente produktonan na e establesimentunan aki por check nos wèpsait www.fundashonpakonsumido.org. Aki bo por tira un bista riba e lista amplio i asina traha bo lista di kompra i skohe unda ta kumbiní abo pa kumpra bo kuminda di laman. Mester paga tinu riba diferensia basta remarkabel di sigur 5 florin te ku 23 florin entre establesimentunan di prinsipalmente piska fresku manera salmou i piska seku manera por ehèmpel bakiou.
E tòp 3 di supermerkadonan mihó surtí na e okashon aki ta:
- Mangusa Hypermarket ku 84 produkto
- Centrum Piscadera ku 83 produkto
- Mangusa Rio ku 80 produkto.
E tòp 3 supermerkadonan ku e mihó preis na e okashon aki ta:
- Mangusa Hypermarket ku 33 produkto
- Mangusa Rio ku 28 produkto
- Centrum Piscadera ku 25 produkto
Durante di e komparashon di preis aki no a tene kuenta ku kalidat ni pais di importashon di e produktonan. Pa kualkier remarke òf informashon por tuma kontakto ku nos semper na 462-6666 òf manda nos un e-mail na info@fundashonpakonsumido.org.
