Anualmente Fundashon pa Konsumidó den estrecho koperashon ku Inspekshon Ekonómiko di Ministerio di Desaroyo Ekonómiko, ta hasi anotashon di preis durante e temporada di kuaresma. E meta di e komparashon di preis aki, meskos ku e demas komparashonnan di preis, ta pa halsa e nivel di konsientisashon serka nos konsumidónan i motivá nan pa hasi kompra na un manera kumbiniente.
E medidanan aktual di prevenshon di Covid 19, inkluyendo Lockdown i plachi di dia, ta pone ku nos komportashon komo konsumidó mester ta aun mas responsabel i konsiente. For di análisis di preisnan den Lockdown di aña pasá, nos por pronostiká ku preisnan lo por subi. P’esei ta importante pa bo aktua segun bo forsa.
Pa loke ta trata e komparashon di preis di kuaresma, esaki a tuma lugá den e periodo di 9 pa 18 di mart 2021. Den e periodo aki Inspekshon Ekonómiko di Ministerio di Desaroyo Ekonómiko a bishitá 15 diferente establesimentu i a kontrolá preis di un kantidat di 121 produkto.
E supermerkado- i minimarketnan ku a keda bishitá ta: 2000, Van den Tweel, Arco Iris, Bon Bini, Boulevard Market Place, Centrum Mahaai, Centrum Piscadera, Dande, Esperamos, Mangusa Rio i Mangusa Hypermarkt, New Plaze/De Ruyterkade, Vreugdenhil i Luna Park.
Mayoria di e produktonan ku a keda kompará ta komestibelnan òf produktonan di laman ku no ta kai bou di preis máksimo stipulá dor di Gobièrnu. E produktonan ta repartí den diferente kategoria, entre otro: tuna den bleki, salmou den bleki, makrel den bleki, saldinchi den bleki, uster, piská, bòkel, bakiou ku wesu, bakiou sin wesu, krab den saku, mix seafood den saku, bèrdura, bonchi den paki i na bleki, sòpi den bleki, funchi, maishi, i roibit.
Mangusa Hypermarket: E supermarket ku mas produkto di kuaresma na preis mas ekonómiko
A base di e komparashon di preis, Fundashon pa Konsumidó por konkluí ku e dos Mangusa supermarketnan ta esnan mas barata pa loke ta trata nos selekshon di produktonan di kuaresma. Di e 121 produktonan ku nos a selektá, Mangusa Hypermarket tabatin 39 produkto na un preis mas abou i Rio Canario tabatin 35 produkto na un preis mas kumbiniente. Bon Bini Supermarket ta keda na di tres lugá ku un kantidat di 24 produkto.
Bon Bini Supermarket: E supermarket mihó surtí ku produktonan di Kuaresma
Segun e resultadonan di e komparashon di preis, Bon Bini Supermarket a sali e supermarket mihó surtí pa loke ta trata e 121 produktonan ku a keda pre- selektá. Di e 121 produktonan aki, Bon Bini tabatin 83 produkto den rèki. E di dos lugá ta bai pa Mangusa Hypermarket, kual tabatin un kantidat di 81 produkto i e di tres lugá ta bai Arco Iris Supermarket ku tabatin un kantidat di 80 produkto.
Unda ta kumbiní bo kumpra?
Resultadonan di e análisis di preis ta mustra ku tin un diferensia di preis grandi, prinsipalmente den produktonan di laman manera piska fresku i seafood mix. Pues, kompará i evaluá promé ku bo kumpra.
Nos a tuma nota ku pa loke ta trata kabes di piska, tilapia, panga,salmou, grastèlchi i piska kora, Mangusa Rio i Hypermarket ta e supermerkadonan ku tin e produktonan aki na un preis mas barata. Si bo mester di tuna i salmou den bleki, Bon Bini ta e supermerkado ideal.
Tene na kuenta
Durante e investigashon aki solamente a hasi un komparashon di preis i no a tene kuenta ku e kalidat di e produkto. Teniendo esaki na kuenta Fundashon pa Konsumidó ta hasi un apelashon na tur konsumidó pa no aseptá produktonan inferior, pa paga bon tinu riba reglanan di higiena i wak bon loke bo ta kome. Tambe ta di gran importansia pa kontrolá fecha di vensementu promé ku kumpra kualke produkto den establesimentu.
No lubidá! Kada un florin ta konta. Pues no hasi kompra basá riba emoshon.
Pa fasilitá i pa informá nos konsumidónan mas mihó, Fundashon pa Konsumidó a pone diferente preisnan di e produktonan pre- selektá aki den un tabèl ya asina kada konsumidó por tin un bista mas amplio na kua supermerkado ta mas kumbiniente pe hasi su kompranan. E tabèl aki ta aksesibel tambe via nos wèpsait: www.fundashonpakonsumido.org.
Pa kualke pregunta, awor por tuma kontakto ku Fundashon pa Konsumidó via number di telefòn 5264648. Por bishita nos página di Facebook: Fundashon pa konsumidó i tambe manda nos un email na info@fundashonpakonsumido.org
