Djasabra último 18 di Yüni 2022 Fundashon pa Konsumidó a otorgá sertifikado na e promé grupo di kursista ku a partisipá na e kurso di presupuesto “Ku Bista riba Kada un Depchi”. Nòrmalmente e kurso di presupuesto aki ta tuma lugá den luna di Sèptèmber pero den kuadro di e kampaña Informá I Konsientisá nos a habri oportunidat den e temporada aki tambe pa un grupo por partisipá. Fundashon pa Konsumidó ta ofresé e kurso di presupuesto aki ku e meta pa ekipá e konsumidó ku konosementu pa asina e por enfrentá su retonan finansiero, hasi mihó eskoho I biba un bida balansá. E kurso tabata na enkargo di señora Melissa Corea I durante di e kurso Melissa a para ketu na puntonan importante manera situashon finansiero aktual, nos propio komportashon I mas ku klaro e manera efektivo pa traha un presupuesto balansá.
E anochi di entrega di sertifikado aki tabata unu hopi ameno kaminda señora Jessica de Palm a habri e anochi ku un palabra di bon biní . Señor Erwin de Mezas a hiba palabra komo parti di direktiva. Melissa Corea komo Beleids Medewerker Communicatie en Projecten I alabes e trainer di e kurso tambe a hiba palabra felisitando e kursistanan I tambe motivánan pa pone den práktiká tur e informashonnan ku nan a risibí durante di e kurso. Nevita Mezas di The Business Connection BV a trese un charla inspirativo pa tur presente. Nos por a konta ku representantenan di MEO ku tambe tabata tei presente. E team kompletu di Fundashon pa Konsumidó a traha duru pa organisá e anochi aki I nos por bisa ku esaki tabata un éksito. Trabounan ta bai sigui pa loke ta trata e proyektonan ku Fundashon pa Konsumidó tin pendiente pa e di dos parti di aña aki. Tur persona ku tambe ta interesá pa partisipá na e kurso di presupuesto “Ku bista Riba kada un Depchi”, keda pendiente pa e fecha nobo di inskripshon. Sigui Fundashon pa Konsumidó su pagina di Face Book Fundashon pa Konsumido pa asina bo no pèrdè niun informashon.
