Fundashon Pa Konsumidó a lansa un proyekto nobo ku e lema: “Ku un miho servisio, nos tur ta kontentu!” Ku e proyekto aki, Fundashon Pa Konsumidó ke yuda promové un servisio di kalidat na Kòrsou.
Pa Fundashon Pa Konsumidó ta sumamente importante pa e konsumidó tin un bon eksperensia na momento ku e bishitá kualke negoshi òf establesimentu.
E término ‘mal servisio’ ta bini dilanti konstantemente, no solamente serka nos na Fundashon pa Konsumidó pero tambe riba retnan sosial bo por mira diferente komentario kaminda ku konsumidónan ta eksperensia un mal servisio na un negoshi òf establesimentu na momento di hasi kompra òf tuma servisio.
Na e otro banda, mester rekonosé ku tin algun empleado ku ta duna un ekselente servisio i ta hopi amabel.
E proyekto aki ta duna e konsumidó oportunidat pa e por ekspresá su mes, ku e meta pa huntu nos stimulá negoshinan i establesimentunan pa duna konsumidónan un servisio riba nivel.
Pa nos por kumpli ku e meta aki, nos tin mester di bo partisipashon. Entrante awe tin un formulario riba nos website www.fundashonpakonsumido.cw. ku por yena i konta bo eksperensia. E formulario ta konsistí di solamente 7 pregunta.
Kontando nos bo eksperensia, bo ta:
– Yuda e kompania òf establesimentu pa drecha e servisio na kliente
òf
– Elogiá e empleado ku ta duna un ekselente servisio
Konta nos bo eksperensia pa asina yuda trese e kalidat di servisio ku nos tur ta deseá.
Ku un mihó servisio… nos tur ta kontentu!
Pa mas informashon por tuma kontakto ku Fundashon pa Konsumidó na +5999 462 6666 òf por mail nos na info@fundashonpakonsumido.cw
