Fundashon pa Konsumidó den su afan di informá i tambe vigilá temanan di importansia pa nos komunidat, ta informá tur komersiante ku nos a start ku un proyekto ku e lema ‘Ku un mihó servisio nos tur lo ta kontentu!’.
E proyekto ta duna konsumidó e oportunidat pa registrá e tipo di servisio risibí. Esaki ku e meta pa e konsumidó risibí e servisio ku e ta meresé.
E término ‘mal servisio’ ta bini dilanti konstantemente, no solamente serka nos na Fundashon pa Konsumidó pero tambe riba retnan sosial bo por mira diferente komentario kaminda ku konsumidónan ta eksperensia un mal servisio na un negoshi òf establesimentu na momento di hasi kompra òf tuma servisio. Na e otro banda, mester rekonosé ku tin algun empleado ku ta duna un ekselente servisio i ta hopi amabel.
Brinda un bon servisio ta un faktor importante pa un negoshi òf establesimentu pa krese su klientela òf mantené un bon relashon ku e klientela eksistente.
Un negoshi òf establesimentu ku ta duna un servisio di kalidat, ta kreá konfiansa i lealtat serka e konsumidó.
Un konsumidó satisfecho ta bishita bo negoshi òf establesimentu bèk i tambe lo rekomendá bo negoshi òf establesimentu na otronan.
Ademas, brinda un bon servisio ta demostrá e profeshonalismo di un negoshi òf establesimentu i tambe e rèspèt ku e tin pa e konsumidó.
Kada momento ku un konsumidó bishitá un negoshi òf establesimentu, mester mira esaki komo un oportunidat pa demostrá balor i kompromiso pa su klientela.
Un negoshi mester realisá ku sin e konsumidó no tin benta, sin benta un negoshi no ta krese. Den un merkado kaminda tin hopi konkurensia, e servisio ku ta ser duná na e konsumidó, por diferensiá i resaltá bo negoshi.
Un konsumidó satisfecho ta yuda e negoshi krese, pero un konsumidó mal kontentu por daña e reputashon di un negoshi.
Pa mas informashon por tuma kontakto ku Fundashon pa Konsumidó na +5999462 6666 òf por manda nos un mail na info@fundashonpakonsumido.cw
