Fundashon pa Konsumidó ta aploudí e desishon di Parlamento di Kòrsou pa implementá un lei kaminda tur siudadano na Kòrsou por tin akseso na un kuenta bankario.
Consumers International e organisashon madre di konsumidónan for di aña 2012 a traha riba un proyekto den Karibe kaminda akseso na un kuenta di banko pa kada konsumidó tabata un di e metanan prinsipal. Na paisnan manera Jamaica i Barbados, a yega na un akuerdo pa traha riba un kódigo di kondukta den sektor bankario pa asina hisa e nivel di servisio i tambe pa reforsá transparensia i protekshon di konsumidónan.
Na aña 2015 Fundashon pa Konsumidó a sigui ku e trayekto aki, pa boga pa tur siudadano por tin un kuenta di banko, despues ku instansianan vital den nos komunidat a stòp di aseptá pago ku sèn efektivo serka e konsumidó i a bai over na aseptá pagonan solamente via “online banking” òf pa medio di ‘swipe’. E desishon aki tabataun dje motibu pa Fundashon pa Konsumidó sigui aktivá i boga pa tur konsumidó por bin na remarke pa tin nan propio kuenta di banko.
Den e era moderno ku nos ta biba ta insólito ku ainda tin konsumidónan ku no tin un kuenta di banko. Un kuenta di banko ya no ta un luho, sino un nesesidat. Un kuenta di banko ta un instrumento indispensabel pa un persona por aktua ku fasilidat den nos komunidat.
Sin un kuenta di banko i un tarheta di banko, un konsumidó no por hasi uzo di tráfiko di pago moderno manera lanta sèn for di un bankomátiko, “swipe òf paga su kuentanan “online”. E konsumidó sin un kuenta ta hañ’é obligá di kobra na sèn kèsh i kana ku sèn kèsh, ku tur e konsekuensianan ku esei por trese kuné pa su seguridat. E ta hañ’é obligá di para den rei na banko pa hasi tur su transakshonnan di pago i su debenan di tur luna. Esakinan tur ta kosta tempu i esfuerso ku por ser evitá si e konsumidó ta disponé di un simpel kuenta di banko.
Nos tur por a eksperenshá den temporada di Covid kon mayoria instansha, pa nan por a sigui hasi negoshi, tabata ofresé nan produktonan via di nan tiendanan online. Di e manera ei konsumidónan por a (sigui) hasi nan kompranan den komodidat di su hogar, shòp trankil i ku kontròl di su sèn, un fasilidat ku ta posibel únikamente si e konsumidó ta disponé di un kuenta di banko.
Aparte di por hasi uzo di e tráfiko moderno di pago, e echo ku bo tin bo sèn riba un kuenta di banko ta pone ku bo fondonan ta seif, bo por tin akseso 24/7 na bo sen i un bista i kontròl di un manera fásil na bo sèn.
Teniendo tu e esakinan na kuenta Fundashon pa Konsumidó ta kere firmemente ku den e era digital aki, tur persona mester por tin e derecho di por tin nan propio kuenta di banko. Dia pa dia e mundu digital ta krese mas, ya na mayoria pais biba sin un kuenta di banko ta imposibel. Mirando ku Kòrsou no ta keda atras den e avanse digital aki, ta sumamente importante pa e lei aki keda implementá, di manera ku tur persona na Kòrsou por tin e derecho di tin un kuenta di banko.
Fundashon ta spera ku pronto e lei aki drenta na vigor i nos bankonan lo koperá, pa tur siudadano tin nan propio kuenta di banko.
Click Aki: Komparashon di Preis supermerkado + minimarket december 2024
Pa mas informashon por tuma kontakto ku Fundashon pa Konsumidó na +5999 462-6666 òf por e-mail nos na Info@fundashonpakonsumido.org
