Tur aña den kuadro di e selebrashon di Día Mundial di e Derechonan di Konsumidó, Consumers International, Fundashon pa Konsumidó i diferente organisashonnan rònt mundu ku tambe sali na defensa di e konsumidó, ta para ketu na un tema di konsientisashon. Manera ya ta konosí kaba e tema di e aña aki ta “Produktonan Seif, Konsumidó ku Konfiansa”.
Fundashon pa Konsumidó a tuma nota ku mas i mas produkto, ta subi nos merkado lokal, pero esakinan ta bini ku etikètnan, instrukshonnan i otro informashon importante den idiomanan ku konsumidónan na Kòrsou no por lesa ni komprondé. E situashon aki por limitá e posibilidat di konsumidónan pa hasi un eskoho bon informá i pa usa e produktonan di un manera sigur i responsabel.
Esaki sigur a krea preokupashon serka nos i p’esei nos a tuma e inisiativa pa aserká sr. Lee Inspektor pa protekshon di salú, pa haña mas informashon tokante e sistema di kòntròl di produktonan importá na Kòrsou.
Durante e kombersashon, señor Lee a duna un splikashon amplio tokante proseduranan di inspekshon i e medidanan ku ta wòrdu apliká ora un produkto no ta kumpli ku e regulashonnan. Segun señor Lee ta splika, tur produkto ku wòrdu importá na Kòrsou, mester kumpli ku e regulashonnan vigente, inkluyendo e eksigensianan di e Lei di Etikèt (etiketteringswetgeving). Esaki ta nifiká ku e informashonnan riba e etikèt di un produkto mester ta kompleto na un idioma komprendibel (Papiamentu, Ingles, Spañó òf Hulandes) i ta kumpli ku e eksigensianan legal por ehèmpel fecha di kaduká, fecha di produkshon i ingrediente. Inspekshon ta na altura ku tin produkto di konsumo riba merkado ku tin etikèt ku no ta skibi den e idiomanan meshoná den nos lei. Inspekshon ta den kombersashon ku e importadónan pa wak kon ta resolvé e problema aki.
E promé kòntròl di produktonan ku ta drenta nos pais ta wòrdu hasí dor di Douane. Durante di e inspekshon aki, sí Douane nota iregularidatnan òf sospechá ku un produkto no ta kumpli ku regulashonnan, nan ta tuma kontakto ku e instansia konserní, den e kaso aki Inspekshon di salú, pa hasi un evaluashon mas profundo.
Si despues di investigashon resultá ku e produkto no ta sigur pa e konsumidó, e produkto no ta haña pèrmit pa drenta Kòrsou.
Señor Lee a indiká tambe ku Inspekshon ta traha den estrecho kolaborashon ku importadónan, pa garantisá ku produktonan ku ta drenta nos merkado, ta kumpli ku e eksigensia di seguridat. Den mayoria kaso importadónan ta bon informá tokante e regulashonnan ku mester kumpli kuné promé ku importá un produkto.
