Fundashon pa Konsumidó a partisipá na un tayer informativo titulá “ Integrity and Labelling”. E tayer aki tabata un inisiativa di un kompania ku ta para pa protekshon di marka ;DISOSA BPS den estrecho koperashon ku e firma di abogado aki na Kòrsou Herben Law huntu ku su propietario i direktor spesialista den lei di derechi di propiedat intelektual (Intellectual Property Rights protection) .
E tayer a tuma lugá dia 4 di mart 2024 na Fundashon pa Konsumidó. Huntu ku Fundashon pa Konsumidó tambe tabatin 2 representante di Bureau Intellectual Property (BIP). Durante di e seshon aki a para ketu riba diferente punto importante i delikado na momentu ku ta trata etikèt di produkto den e kaso aki bebida alkohóliko. Representante di Industria Internashonal di bibidanan alkohóliko DIAEGO & MHCS, ta splika ku tin ku pone mas atenshon i alertá e konsumidó tokante di manipulashon ku ta tumando lugá ku e etikètnan di diferente bòternan di bebida alkohóliko den establesimentunan. Ku manipulashon ta referí entre otro ku e codenan riba e bòter ta keda kitá. E konsumidó ku no ta na altura di esaki ta kumpra sin ta konsiente di kiko por a tuma lugá ku e bòternan aki. Nan a splika kon por detektá e fayo na e bòternan aki na momento ku nan ta den rèki. Ta p’esei ta importante pa na momentu ku bo ta bai kumpra bo bòter di bebida alkohóliko pa bo paga bon tinu si e ta bon seyá manera mester ta i si e code di e bòter ta pará visibel patras di e bòter. Si esaki no ta e kaso òf si bo ta ripará ku e code ta di skrap òf tin un teip riba dje no kumpr’é. Esaki por ta señal ku e etikèt di e bòter a keda manipulá pa un terser persona. Konsekuentemente no por garantisá ku e kontenido den e bòter ta konfiabel i safe pa e konsumidó. Ta p’esei mester keda splika e konsumidó dikon ta asina importante pa bo paga bon tinu na e etikèt di produkto ku bo ta kumpra.
E informashon aki tabatin sigur un balor agregá pa nos di Fundashon pa Konsumidó. Di e forma aki nos por yuda alertá I tambe protehá e konsumidó. Nos ta gradesí Herben Law i su ekspertonan pa e inisiativa aki. Próksimamente ta bai toka turno na e instansianan na St. Maarten pa nan tambe risibí e informashon aki.
