Fundashon pa Konsumidó a bishita diferente botika durante e periodo di 17 di ougùstùs te ku 24 di ougùstùs. Aki a anotá preis di diferente produkto kual mas ta wòrdu kumprá pa nos konsumidónan den botikanan aki na Kòrsou. Saliendo for di e punto di bista ku e konsumidó di mester ta hopi mas konsiente, krítiko, alertá i responsabel, e meta primordial di Fundashon pa Konsumidó pa ku e komparashon di preis aki ta, pa yuda e konsumidó den su proseso di hasi un eskoho konsiente.
Durante e periodo ariba menshoná Fundashon pa Konsumidó a bishitá un total di 29 diferente botika. Aki nos a hasi anotashon di preis riba 97 produkto, esaki nos a repartí den diferente kategoria.
E kategorianan aki ta:
awa pa higiena pa boka, djèl pa baña kuné,
pasta di djente, “dental floss”, habon pa baña, puiru, deodorante, toaya femenino, pomada, krema pa kurpa, shampu/ ‘conditioner’, ‘relaxer’ pa kabei, pintura i krema pa kabei, katuna, ‘remover pa rushi di uña’, zalf pa kurpa, produkto pa limpia kara, krema pa feita i ‘splash lotion’.
Tòp 3 di e botikanan mihó surtí.
Pa loke ta trata e surtido, na promé lugá botika Cerrito a resultá esun mihó surtí ku un kantidat di 74 produkto di e 97 produktonan ku nos a pre selektá.
Botika Groot Piscadera ta na di dos lugá ku 71 produkto.
Na di tres lugá botika Mahaai i Novo ku 64 produkto di e 97 produktonan ku nos a pre selektá.
Diferensia di preis
Fundashon pa Konsumidó a konstatá diferensia di preis notabel entre algun produkto. Preisnan ta varia di fl. 0.65 te ku fl. 16.21 i un di e motibunan por ta konsekuensia di pais ku e produkto a wòrdu importá. Por ehèmpel Nivea verzachtende tonic 200 ml ta kosta
fl. 23.16 na botika Sòrsaka i na 5 otro botika e ta kosta fl. 6.95.
Ta p’esei Fundashon pa Konsumidó ke enkurashá nos konsumidónan pa evaluá preisnan bon, i lesa etiket di forma ku por hasi kompra konsiente i responsabel.Tene na kuenta ku botikanan tambe sa tin huki ku produktonan den oferta, kual tambe por pone den konsiderashon na momentu di kompra.
Pa mas informashon tokante di komparashon di preis di produktonan di botika i otro informashon relashoná ku derechinan di konsumidó por bishitá nos wèpsait www.fundashonpakonsumido.org òf bèl nos na 462-6666
