Durante e periodo di 6 di ougùstùs te ku 15 di ougùstùs Fundashon pa Konsumidó a bishita diferente botika. Aki a anotá preis di diferente produkto kual mas ta wòrdu kumprá pa nos konsumidónan den botikanan aki na Kòrsou. Saliendo for di e punto di bista ku e konsumidó mester ta hopi mas konsiente, krítiko, alertá i responsabel, e meta primordial di Fundashon pa Konsumidó pa ku e anotashon di preis aki ta pa yuda e konsumidó den su proseso di hasi un eskoho konsiente.
Durante e periodo ariba menshoná Fundashon pa Konsumidó a bishitá un total di 29 diferente botika. Aki nos a hasi anotashon di preis riba 93 produkto, esaki nos a repartí den diferente kategoria.
E kategorianan aki ta:
awa pa higiena pa boka, djèl pa baña kuné, pasta di djente, habon pa baña, puiru, deodorante, toaya femenino, pomada, krema pa kurpa, shampu/ ‘conditioner’, ‘relaxer’ pa kabei, pintura i krema pa kabei, katuna, ‘remover pa rushi di uña’, zalf pa kurpa, produkto pa limpia kara, krema pa feita i ‘splash lotion’.
Tòp 3 di e botikanan mihó surtí
Pa loke ta trata e surtido, na promé lugá botika Groot Piscadera a resultá esun mihó surtí ku un kantidat di 67 produkto di e 93 produktonan pre selektá.
Na di dos lugá a resultá di ta Botika Novo ku 66 produkto i na di tres lugá Botika Cerrito ku 65 produkto di e 93 produktonan ku nos a pre selektá.
Tòp 3 di e botikanan mihó preis
Pa loke ta trata mihó preis tambe Fundashon pa Konsumidó a hasi un análisis, na promé lugá Botika Novo a resultá di ta esun ku mihó preis ku 22 di e 93 produktonan. Na di dos lugá ku un mihó preis ta Botika Cerrito i Botika Groot Piscadera ku 21 produkto i na di 3 lugá ku un kantidat di 13 produkto na un mihó preis a resultá Botika Sòrsaka.
Diferensia di preis
Fundashon pa Konsumidó a konstatá diferensia di preis notabel entre algun produkto. Preisnan ta varia di Cg. 0.24 te ku Cg. 16.29. Un di e motibunan por ta konsekuensia di pais ku e produkto a wòrdu importá. Fundashon pa Konsumidó ke enkurashá nos konsumidónan pa evaluá preisnan bon i traha bo lista promé ku bo bai hasi kompra. Tambe ta importante pa lesa etikèt di forma ku por hasi kompra konsiente i responsabel.
Tene na kuenta ku botikanan tambe sa tin huki ku produktonan den oferta, kual tambe por pone den konsiderashon na momentu di kompra.
Klek pa download: Prijsvergelijking botika aug. 2025
Pa mas informashon tokante di anotashon di preis di produktonan di botika i otro informashon relashoná ku derechinan di konsumidó por bishitá nos wèpsait www.fundashonpakonsumido.cw òf por bèl nos na +5999 462-6666
