Febrüari ta luna di amor i apesar ku nos ta den ambiente di karnaval, e dia spesial di San Valentin ta keda un dia ku e konsumidó ta pone atenshon na dje. Hopi konsumidó ta mustra amor i apresio na e sernan kerí ku un regalo. Den sierto kaso por skohe tambe pa un cadeaubon. Di e forma aki e persona mes por bai skohe algu di su agrado despues.
E momento aki ta hopi importante pa konsientisá tantu e komersiante komo e konsumidó tokante di e aspekto aki. Na Kòrsou nos no tin un lei ainda kaminda ta indiká spesífikamente kon tin ku atendé ku e parti di cadeaubon. P’esei ta bon pa tantu e komersiante i komo e konsumidó ta na altura di algun punto di atenshon komo ku ta trata aki di un kompra i pa ku esaki si, su deber i derechinan ta ankra den lei.
Ta bon pa komersiantenan tene na kuenta ku e fecha di vensementu mester ta pará visibel riba e cadeaubon. Si esaki no ta pará riba e cadeaubon, e cadeaubon aki no por kaduká. Un bon komersiante tin e deber di informá tur e kondishonnan mará na e kompra di cadeaubon na e persona ku ta kumpra esaki.
Di otro banda ta hopi importante pa e konsumidó tambe ta kritiko i para ketu na e puntonan aki promé ku e disidí di kumpra un cadeaubon komo regalo. Chek/ informá e tèrmino di vensementu di un cadeaubon i tambe e kondishonnan mará na kompra di un cadeaubon promé ku tuma un desishon definitivo. Si bo no ta di akuerdo ku e informashon òf kondishonnan di e komersiante, no kumpra e cadeaubon aki. E komersiante tin e deber di indiká e tipo di kondishonnan aki delantá na e konsumidó. Di e forma aki e konsumidó por skohe konsiente si e ta drenta e akuerdo aki òf nò. Banda dje aspektonan ariba menshoná ta altamente rekomendabel, pa ora ta regalá un persona un cadeaubon, inform’é bon di e kondishonnan di e cadeaubon, speshalmente e tèrmino di vensementu pa asina e tambe por tene kuenta ku esakinan.
Bon mirá, un cadeaubon ta un depósito di sèn ku no mag keda ningá. Pero mirando ku no tin un lei ku ta para tras di esaki ainda , ta bon pa abo ku risibí e cadeabon komo regalo, tuma bon nota di e fecha di vensementu, no ward’e leu den kashi, ku chèns ku ta lubidá riba dje. Hasi uzo di bo cadeaubon na tempu pa evitá kualkier inkumbiniensia i disgustu.
Pa kualkier remarke òf informashon por tuma kontakto semper ku Fundashon pa Konsumidó nos na number di telefon (+5999)4626666 òf manda nos un email na info@fundashonpakonsumido.org.
