Karnavalistanan ta kla pa hasi nan kompra spesial pa e dianan di marcha di karnaval. Tantu partisipantenan den grupo komo esnan kantu di kaminda. Manera ta e kustumber, Fundashon pa Konsumidó den kolaborashon ku Ministerio di Desaroyo Ekonómiko (MEO) ta haña importante pa hasi anotashon di preis di e produktonan ku mas e konsumidó ta kumpra den supermerkado durante di e temporada di karnaval. E anotashon di preis di e makutu di karnaval a tuma lugá dia 10 pa 17 di Febrüari 2025 na 14 establesimentu. Na e okashon aki a anotá preis di 132 diferente produkto. E establesimentunan kaminda a hasi e anotashon di preis ta Van den Tweel, Arco Iris, Best Buy, Boulevard Market Place, Bon Bini Supermarket, Centrum Mahaai, Centrum Piscadera, Esperamos Supermarket, Mangus Rio, Mangusa Hypermarket, Vreugdenhil, Carre Four, Timmyi Luna Park.
E establesimentunan ku a resultá ku mas tantu produkto den e makutu di karnaval na un mihó preis ta Bon Bini Supermarket ku 30 produkto i alabes e ta esun mihó surtí ku 99 produkto for di e 132 produktonan di e makutu di karnaval. Na di 2 lugá ta Mangusa Hyper ku 22 produkto na un mihó preis i Mangusa Rio na di 3 lugá ku 21 produkto na un mihó preis for di e 132 produktonan di e maktutu di karnaval.
Karnaval ta un temporada di goso pero ta hopi importante pa nos keda aktua di forma responsabel. Tene prekoushon na momentu di bai disfrutá di e marchanan. Protehá bo kurpa si bo ta eksponé na hopi solo i bebe hopi awa. Si bo ta bai hasi bo grill kantu di kaya, kòrda mantené e karninan i salada friu pues na e temperatura apropiá. Gasta solamente loke ku ta nesesario i keda tene kuenta semper ku bo presupuesto. Nos ta rekomendá pa uza e lista amplio aki pa bo traha bo lista di kompra adelantá i skohe pa bo mes na unda ta kumbiní bo pa kumpra. Nos a nota diferensia grandi den preis di bibidanan alkohóliko entre supermerkadonan. Paga tinu na e diferensianan aki na momentu di hasi bo kompra.
Nunka ta dimas pa kòrda tur konsumidó pa si bo ta bebe no stür i si bo ta stür no bebe. Karnaval ta un temporada dushi pero kòrda aktua di forma responsabel pa bo no mester lamentá despues. Fundashon pa Konsumidó huntu ku MEO ta deseá tur konsumidó un felis karnaval 2024. Pa kualkier informashon adishonal por tuma kontakto ku Fundashon pa Konsumidó na 4626666 òf manda nos un e-mail na info@fundashonpakonsumido.cw
