Karnavalistanan ta kla pa hasi nan kompra spesial pa e dianan di marcha di karnaval. Tantu partisipantenan den grupo komo esnan kantu di kaminda. Manera ta e kustumber, Fundashon pa Konsumidó den kolaborashon ku Ministerio di Desaroyo Ekonómiko (MEO) ta haña importante pa hasi anotashon di preis di e produktonan ku mas e konsumidó ta kumpra den supermerkado durante di e temporada di karnaval. E anotashon di preis di e makutu di karnaval a tuma lugá na 14 establesimentu. Na e okashon aki a anotá preis di 128 diferente produkto. E establesimentunan kaminda a hasi e anotashon di preis ta Van den Tweel, Arco Iris, Best Buy, Boulevard Market Place, Bon Bini Supermarket, Centrum Mahaai, Centrum Piscadera, Esperamos Supermarket, Mangusa Rio, Mangusa Hypermarket, Vreugdenhil, Carre Four, Timmy i Luna Park.
Mihó preis
E establesimentunan ku a resultá ku mas tantu produkto den e makutu di karnaval na un mihó preis ta Bon Bini Supermarket ku 44 produkto for di e 128 produktonan di e makutu di karnaval. Na di 2 lugá ta Mangusa Hypermarket ku 35 produkto na un mihó preis i Mangusa Rio na di 3 lugá ku 33 produkto na un mihó preis for di e 128 produktonan di e makutu di karnaval.
Mihó surtí
E establesementu mihó surti a resultá di ta Bon Bini supermarket ku 111 produkto di e 128 produktonan di e makutu di karnaval. Na di dos lugá Mangusa Hyper i Mangusa Rio ku 103 produkto i na di tres lugá Centrum Piscadera i Centrum Mahaai ku 85 produkto di e makutu pre-selektá.
Karnaval ta un temporada di goso pero ta hopi importante pa nos keda aktua di forma responsabel. Tene prekoushon na momentu di bai disfrutá di e marchanan. Protehá bo kurpa si bo ta eksponé na hopi solo i bebe hopi awa. Si bo ta bai hasi bo grill kantu di kaya, kòrda mantené e karninan i salada friu pues na e temperatura apropiá. Gasta solamente loke ku ta nesesario i keda tene kuenta semper ku bo presupuesto. Nos ta rekomendá pa konsulta lista amplio aki pa bo traha bo lista di kompra adelantá i skohe pa bo mes na unda ta kumbiní bo pa kumpra. Nos a nota diferensia den preis di bibidanan alkohóliko entre supermerkadonan. Paga tinu na e diferensianan aki na momentu di hasi bo kompra.
Nunka ta dimas pa kòrda tur konsumidó pa si bo ta bebe no stür i si bo ta stür no bebe. Karnaval ta un temporada dushi pero kòrda aktua di forma responsabel pa bo no mester lamentá despues.Fundashon pa Konsumidó huntu ku MEO ta deseá tur konsumidó un felis karnaval 2026.
Click i download aki: PV 2026 karnaval
Pa kualkier informashon adishonal por tuma kontakto ku Fundashon pa Konsumidó na 4626666 òf manda nos un e-mail na info@fundashonpakonsumido.cw
