Tin diferente faktor ku ta determiná preis di e artíkulo nan aki.
Hopi biaha nos ta probechá di ofertanan atraktivo pa kumpra e aparatonan elektróniko ku nos tin mester. Pero ta importante pa sa ku tin diferente faktor mas ku mester tene kuenta kuné na momentu ku ta bai kumpra un di artíkulonan aki. Mester tene kuenta ku entre otro, marka, grandura di (kantidat di BTU, cub, òf kilo), si e ta “inverter” òf nò, garantia pa kòmprèser di e èrko, garantia general i si tin servisio di reparashon despues di kompra.
Ta konsehabel pa chek frekuensia di kada artíkulo.
Fundashon pa Konsumidó ta konsehá pa ora ta hasi kompra di aparatonan elektróniko, pa chek bon frekuensia di kada aparato. Si un artíkulo ta 110v ta rekomendabel pa usa un transformatòr. Riba nos merkado tin hopi produkto 60 hertz ku por kima lihé. Na Kòrsou nos frekuensia tin un kapasidat di 127/220 vòlt i awendia tambe asta 380 vòlt, ku un frekuensia di 50 hertz. Por ehèmpel ta importante pa ora ta skohe bo artíkulonan elektróniko, ku esaki ta kuadra ku e spesifikashon elektróniko lokal. Dikon esaki ta importante? Si un aparato ta diseñá pa traha ku 60HZ i e ta hañ’e ta operá ku un koriente di 50 hertz, por pone ku esaki no ta bai funshoná di un forma efisiente. E por ranka mas koriente i daña e aparato muchu mas lihé.
Ta bon pa abo konsumidó informá adelantá kantidat di aña di servisio di e establesimentu kaminda bo ta bai kumpra bo aparato elektróniko i wak si e ta di konfiansa. Otro tep importante pa konsumidó tene kuenta kuné ta pa no kumpra aparatonan elektróniko na otro tipo di establesimentunan ku no ta spesialisá den aparato elektróniko. Por resultá ku si e produkto daña i e ta den garantia, hopi biaha e kompania aki no por ofresé servisio di reparashon, ni no por para garantia pa e produktonan aki.
Fundashon pa Konsumidó ta konsehá tur hende pa tuma bon nota di tur e detayenan ku tin riba e lista pa por hasi un eskoho mas konsiente i efisiente posibel. Pa kualkier informashon por tuma kontakto ku Fundashon pa Konsumidó na 4626666 òf manda nos un e-mail na info@fundashonpakonsumido.org.
