Fundashon Pa Konsumidó ta sigui ku anotashon di preis den Supermerkadonan i tambe algun Mini market. E siman aki nos a skohé pa publiká un tabèl di komparashon di preis di e luna òktober vs yüli 2026. E tabèl aki ta pa duna bo un bista riba e desaroyo di preis riba produktonan den supermerkadonan i mini market. Konsehabel ta pa tira un bista pa bo mes riba e preisnan i sigui hasi bo kompranan di un manera konsiente.
E 14 establesimentunan ku a keda bishitá ta: Van den tweel, Best Buy, Bon Bini supermarket, Boulevard Market Place, Centrum Mahaai, Centrum Piscadera, Carrefour, Timmy, Esperamos supermarket, Mangusa Rio, Mangusa Hypermarket, Ruyterkade, Vreugdenhil, Luna Park.
Na e establesimentunan aki nos a anotá preis di 241 produkto, entre otro karni, belèg, fruta i berdura.
Análisis
Segun análisis di e komparashon di preis di luna di òktober kompará ku yüli, Fundashon pa Konsumidó a konstatá ku tabata tin mas oumento di preis den e kategoria di karni.
Nos a nota ku for di e lista di 30 tipo di karni, Centrum Mahaai i Centrum Piscadera a subi preis di 17 karni for di e lista, siguí pa Mangusa Rio i Mangusa Hyper ku a subi preis di 13 tipo di karni i Carrefour a subi preis di 11 tipo di karni.
Tambe nos por a mira ku algun supermerkado a mantené mayoria preis den kategoria di karni, igual na esun di yüli. Bon Bini a mantené 22 preis di tipo karni for di e lista di 30. Esperamos a mantené 13 na mes un preis i alabes a baha 5 karni kual ta mas ku tur otro i Vreugdenhil a mantené 19 preis di karni
Tambe nos por a nota ku mayoria establesimentunan a mantené nan preis di berdura den bleki igual, kompará ku luna di yüli, meskos ta konta pa aros, maismeel i tarwemeel.
Fundashon pa Konsumidó ta hasi un petishon na tur konsumidó pa konsultá e lista di komparashon di preis di òktober vs yüli di supermerkadonan i mini market, p’asina evaluá unda ta kumbiní bo hasi kompra. Realisá ku awor mas ku nunka mester tene kuenta ku e pòtmòni i kumpra loke di bèrdat ta nesesario.
Download e lista: PV superm & minim. eerste levensmiddelen okt. vs juli 2026
Pa bo tambe haña akseso na e lista di komparashonnan di preis aki, bo por tuma kontakto ku Fundashon pa Konsumidó na telefòn +5999462 6666 òf via nos sistema di mail na info@fundashonpakonsumido.cw òf bo por subi riba nos wèpsait www.fundashonpakonsumido.cw
