Manera ta kustumbrá Fundashon pa Konsumidó ta hasi anotashon di preis den e kategoria di karni, galiña, belèg, fruta i berdura. Pa e komparashon di preis aki a selektá un kantidat di 93 produkto na 17 establesimentu den e temporada di 17 di yanüari 2024 te ku 22 di yanüari 2024. E supermarket i minimarketnan kaminda e komparashon di preis a tuma lugá ta:Arco Iris, Van den Tweel ,Arti’s , Best Buy, Bon Bini supermarket, Boulevard Market Place, Centrum Mahaai i Piscadera, Carre Foure, Timmy, Esperamos supermarket, Mangusa Rio Canario i Hypermarket, Vreugdenhil, Ruyterkade, Luna Park i Tropicana. Nos a tuma nota ku mayoria di e supermerkado i minimaketnan tin un variashon amplio den e kategoria di karni.
Pa loke ta trata e makutu di karni, fruta i berdura nos a logra saka e 3 supermerkadonan mihó surti. E supermerkadonan ku a resultá mihó surtí ta. Centrum Mahaai ku 83 produkto, Bon Bini ku 79 produkto i Centrum Piscadera ku 77 produkto.
Fundashon pa Konsumidó ta rekomendá e konsumidó pa semper traha un lista di kompra adelantá i hasi uzo di nos lista amplio di komparashon di preis pa asina skohe di forma konsiente i segun loke abo tin mester.
En bista ku e preisnan di e establesimentunan ta keda varia, nos mester keda mantené nos mes bon informá pa asina kumpra di forma responsabel. Bo por tuma nota di e lista di anotashon di preis riba nos wèpsait www.fundashonpakonsumido.org. Pa kualkier pregunta por tuma kontakto ku nos na 462-6666 òf manda nos un e-mail na info@fundashonpakonsumido.org.Tene na kuenta ku pa e komparashon di preis aki no a tene kuenta ku kalidat di produkto ni pais di importashon.
