Fundashon pa Konsumidó a hasi komparashon di preis di supermerkado i minimarket. Pa e komparashon di preis aki a selektá un kantidat di 134 produkto i a bishitá 15 establesimentu den e temporada di 14 di mei 2024 te ku 22 di mei 2024. E komparashon di preis a tuma lugá na:Arco Iris, Van den Tweel, Best Buy, Bon Bini supermarket, Boulevard Market Place, Centrum Mahaai i Piscadera, Esperamos supermarket, Carrefoure, Timmy,Mangusa Rio Canario i Hypermarket, Vreugdenhil, Luna Park, New Plaza/ De Ruyterkade.
Na e okashon aki nos ta indiká un tòp 3 di establesimentunan mihó surti kaminda e konsumidó tin oportunidat mas amplio pa skohe su produktonan ku ta kumbiní. Centrum Mahaai ta na promé lugá ku 111 produkto, Mangusa Rio i Hypermarket ta na di dos lugá ku 108 produkto i Centrum Piscadera na di 3 lugá ku 106 produkto.
En bista di e subida di preis ku ta tuma lugá ta hopi importante pa traha un lista di kompra i mantené bo mes na esaki. Ta rekomendabel pa nos keda mantené nos mes bon informá pa asina kumpra di forma responsabel. Tuma nota di e lista di anotashon di preis riba nos wèpsait www.fundashonpakonsumido.org pa asina traha bo lista di kompra. Por tuma kontakto ku Fundashon pa konsumidó pa kualkier pregunta na 462-6666 òf manda nos un e-mail na info@fundashonpakonsumido.org.Tene na kuenta ku pa e komparashon di preis aki no a tene kuenta ku kalidat di produkto ni pais di importashon.
