Fakansi grandi ta yegando na su fin i e aña eskolar nobo ta den porta. Pa e aña eskolar nobo nos muchanan mester di diferente artíkulo nobo pa bai skol kuné. Pa e motibu aki Fundashon pa Konsumidó ke enfoká riba e importansia di kumpra produktonan pa skol na un manera konsiente i sabí.
Den e temporada di 9 pa 16 di Yüli Fundashon pa Konsumidó konhuntamente ku Ministerio di Desaroyo Ekonómiko (MEO), a hasi anotashon di preis na un total di 16 establesimentu. E establesimentunan ku a forma parti di e anotashon di preis aki ta:Office Stop, La Curaçao Zeelandia, Curaçao Office Supply, Mensing’s Caminada, Multicentrum 2000, Super Barata, Bruna, Office System, Casa Cesar, Home Plus, Samsom, Martis Agencies, Alankar, Señor Barata, Building Depot i Good Friends.
Fundashon pa Konsumidó a skohe 63 artíkulo di skol ku ta wòrdu mas uzá di kual a hasi anotashon di preis na tur e establesimentunan menshoná. Mester enfatisá ku preisnan pa artíkulonan di skol no ta kai bou di un preis máksimo stipulá pa gobièrnu di Kòrsou, esaki ta pone ku kada negoshante ta liber pa pone su mes preis. Den e anotashon aki no a hasi un komparashon di preis.
For di nos anotashon di preis e tòp tres establesimentunan ku a resultá mihó surtí ta:
- Bruna ku 57 artíkulo
- Casa Cesar ku 51 artíkulo
3. Mensing’sCaminadaku49artíkulo.
Fundashon pa Konsumidó a tuma nota di un kantidat di markanan di artíkulonan pa skol disponibel na e diferente establesimentunan. Mester tene kuenta ku esaki, komo ku e artíkulonan ta bini for di diferente destinashon i esaki tin su influensia riba e preisnan.
Tur e variashon di markanan aki ta brinda e posibilidat pa konsumidónan por hasi nan eskoho konsientemente. E lista di tur establesimentunan, artíkulonan disponibel i nan preis ta visibel riba nos wèpsait www.fundashonpakonsumido.org.
Esaki sigur ta hasi e proseso di búskeda di artíkulonan pa skol na un preis kumbiniente mas fásil pa tur mayor i sobra konsumidónan.
Pa finalisá Fundashon pa Konsumidó ta deseá tur alumno un aña eskolar sumamente eksitoso, kaminda disiplina i trabou duru ta e base pa alkansá e meta deseá.
