Durante e periodo di 15 te ku 20 òktober 2025, Fundashon pa Konsumidó a bishitá 17 diferente establesimentu pa anotá preis di un kantidat di 96 produkto den e kategorianan: karni, fruta i berdura. E 17 diferente establesimentunan aki ta: Van den Tweel, Arco Iris, Best Buy, Bon Bini, Boulevard market Place, Centrum Mahaai, Centrum Piscadera, Carrefour, Timmy, Esperamos, Mangusa Rio, Mangusa Hyper, Ruyterkade, Vreugdenhil, Luna Park, LZF i Queens.
Meta di e anotashon di preis aki ta pa konsientisá i fasilitá nos konsumidónan den nan proseso di kompra. P’esei Fundashon pa Konsumidó ta brinda un lista di preis ku ta duna e konsumidó un mihó bista di kua produkto ta optenibel na kada establesimentu i tambe e diferensianan di preis di kada produkto na e diferente establesimentunan ariba menshoná.
Mangusa Hyper i Mangusa Rio tin mas produkto di karni, belèg, fruta i berdura na mihó preis
Di akuerdo ku e lista di anotashon di preis ku Fundashon pa Konsumidó a traha, Mangusa Hyper a resultá di ta e supermerkado ku mas produkto na mihó preis ku un kantidat di 25 produkto di e 96 produktonan den e makutu pre selektá. Mangusa Rio a resultá na di dos lugá ku 24 produkto na un preis mas kumbiniente i Centrum Piscadera i Centrum Mahaai a resultá na di tres lugá ku un kantidat di 18 produkto ku un mihó preis.
Centrum Mahaai i Piscadera e supermerkado mihó surtí!
E supermerkado mihó surtí pa lokual ta trata karni, belèg, fruta i berdura a resultá Centrum Mahaai i Piscadera. Na ámbos establesimentu tabatin 75 produkto for di e total di 96 produkto ku Fundashon pa Konsumidó a anotá preis di dje. Na di dos lugá a resultá Bon Bini supermarket ku un total di 74 produkto i na di tres lugá Mangusa Hyper i Mangusá Rio ku 71 produkto for di e makutu pre selektá.
Tin diferensia grandi di preis
Fundashon pa Konsumidó a tuma nota ku tin un diferensia grandi di preis entre sierto supermerkadonan, por ehèmpel preis pa 1 kilo di Schouderham ta kosta na Van den Tweel cg42,59 i na Esperamos supermarket e ta kosta cg18,75 un diferensia di cg23,84. Otro diferensia remarkabel ta 1 kilo di Rabu di baka, na Luna park ta kosta cg26,95 i na Mangusa Rio i Hyper esaki ta kosta cg11.95 pa kilo.
Fundashon pa Konsumidó ta sugirí tur konsumidó pa konsultá e lista di komparashon pa ta na altura di e diferensianan. Ta bon pa menshoná ku e diferensianan di preis aki por ta dependé di diferente faktor, entre otro marka di e produktonan, pais prosedente di importashon i kalidat di e produktonan. Fundashon pa Konsumidó ta partisipá ku no a tene kuenta ku e faktornan aki den e komparashon di preis aki.
Kòrda kontrolá kiko bo tin den kashi promé ku bo traha bo lista di kompra
Esaki ta hopi importante pa evitá ku ta kumpra kos i gasta sèn innesesariamente. Fundashon pa Konsumidó ta invitá tur konsumidó pa subi nos website fundashonpakonsumido.cw òf bishitá nos página di Facebook, Fundashon pa Konsumidó, pa tuma nota di e lista di komparashon di preis di karni.
Download aki: PV superm & minim. vlees, groenten en fruit okt. 2025
Tambe por hasi un petishon pa risibí e komparashon di preis via nos e-mail address info@fundashonpakonsumido.cw. Pa kualke pregunta òf remarke tokante di e komparashon di preis por yama nos via telefòn 462-6666.
