Fundashon pa Konsumidó, den su afan di eduká i informá e konsumidó, ta para ketu awe na e fechanan ku tin riba e empake di produkto.
Na momento ku nos ta hasi kompra, komo un konsumidó konsiente nos ta wak kua ta e fecha ku e produkto ta kaduká. Aki nos por mira diferente fecha riba empake di produkto di konsumo.
Esakinan ta:
- Best Before
- Expiry Date /Use by
- Best by
Pa Fundashon pa Konsumidó ta sumamente importante pa nos konsumidónan sa kada un di e inskripshon aki su nifikashonnan.
E inskripshon “Best before” (p.e. December 2025) mester wòrdu interpretá komo fin di e luna indiká. Si solamente luna i aña ta poné, e nifikashon ta último dia di e luna indiká. Segun lei “Best before” ta referí na durabilidat mínimo.
Esaki ta nifiká ku e fabrikante òf importadó ta garantisá kalidat di e produkto te na e fecha indiká.
Despues di e fecha, segun lei, e produkto no por wòrdu mas komersialisá, pero esaki no ta nifiká ku e no ta apto pa konsumo, si e produkto ainda ta mustra i hole bon. E kalidat i e sabor por disminuí (baha) despues di e fecha si.
Punto prinsipal pa interpretá “Best before”:
Kalidat: E produkto por keda safe despues di e fecha, pero sabor, tekstura i holó por disminuí.
Seguridat: No ta igual ku “vervaldatum”. A ménos ku tin señal di deterioro (bleki hinchá, kambio koló, holó i smak), e por keda konsumí. No tin rísiko pa salú di e hende.
Almasená: Durabilidat, kalidat i seguridat ta basá tambe riba kondishon di almasenamentu korekto. Si e produkto no wòrdu wardá bon, kalidat por baha mas lihé. Konsumidó por usa fecha ‘best before’ komo indikashon di kalidat, sinembargo mester kontrolá personalmente si un produkto ainda ta sigui mustra bon, hole bon i smak bon.
Expiry date / Use by (vervaldatum)
Esaki ta hopi mas estrikto ku ‘best before’. Expiry date / Use by ta indiká ku despues di e fecha aki e produkto no ta safe òf efektivo mas.
Seguridat: Produkto no por wòrdu konsumí despues di e fecha, esaki no ta safe mas.
Efektividat: Garantisá kalidat i seguridat te na e fecha indiká riba e produkto.
Ta importante pa NO usa produkto despues di Expiry date / Use by, pa evitá rísiko pa salú.
Benta òf distribushon despues di “expiry date” por kualifiká komo práktika kontrario na protekshon di konsumidó. Outoridatnan kompetente por tuma medidanan.
Best By
Na Merka ta usa e término “Best by” hopi, ku ta nifiká meskos ku “Best before” ku ta indikashon di periodo di mihó kalidat pero por wòrdu usá pa konsumo despues di e fecha.
Fabrikantenan ta usa e fecha aki pa indiká e periodo den kua e produkto tin su mihó kalidat di sabor, holó i tekstura.
Puntonan pa tene kuenta kuné ora di hasi kompra:
- Fechanan manera ariba menshoná
- Empake dañá òf habrí
- No kumpra produkto ku no tin etikèt i òf fecha menshoná
Puntonan pa tene kuenta kuné ku komestibel na kas:
- Warda produkto konforme instrukshon riba e empake, manera “keep refrigerated, store in a cool dry place etc etc
- Si tin duda riba un produkto manera holó, koló òf tekstura straño mihó tira e produkto afó.
- Warda un produkto korekto ta fundamental. Si e produkto no wòrdu warda korektamente, e produkto por pèrdè su kalidat òf bira un rísiko pa salú di e ser humano, e fecha lo no ta bálido komo garantia di kalidat òf seguridat mas.
Pa finalisá Fundashon pa Konsumidó ke enfatisá pa promé ku kumpra un produkto,semper kontrolá e fecha riba e empake. Nos ta konsehá konsumidónan pa NO kumpraningun produkto di konsumo ku no tin un fecha indiká riba dje. Kòrda ku bo salu i bo pòtmòni ta bo responsabilidat.
Pa mas informashon por tuma kontakto ku ofisina di Fundashon pa Konsumidó na telefòn
462-6666 òf via e-mail info@fundashonpakonsumido.cw.
Fundashon pa Konsumidó ke yama un danki na Inspectiegezondheidsbescherming pa nan balioso koperashon.
