Febrüari ta luna di amor i apesar ku nos ta den ambiente di karnaval, e dia spesial di San Valentino ta keda un dia ku konsumidónan ta pone atenshon na dje.
Hopi konsumidó ta demostrá amor i apresio na nan sernan kerí ku un regalo. Un regalo hopi komun ta cadeaubon, esaki ta duna e persona e oportunidat pa e mes por bai skohe algu di su agrado despues.
Fundashon pa Konsumidó ke enfatisá riba e echo ku un cadeaubon no por tin un valides di ménos ku 1 aña.
Segun buki 6 di Kódigo sivil di Kòrsou den Artíkulo 236 tin un kombenio stipulá ku un ‘Cadeaubon’ no por tin un periodo di vensementu di ménos ku 1 aña. Na momento ku un komersiante hasi e periodo di vensementu di un ‘cadeaubon” na ménos ku 1 aña, esaki segun e término legal ta onredelijk bezwarend. Esaki ta nifiká ku un ‘cadeaubon’ ku tin un balides di ménos ku 1 aña no ta hustu pa e konsumidó.
Fundashon pa Konsumidó ta rekomendá tur konsumidó pa hasi informashon promé ku bo kumpra un “cadeaubon”. Si e komersiante para ariba ku e no ta bende cadeaubon ku un periodo di valides di mínimo un aña, nos ta konsehá pa NO kumpra esaki.
A yega tempu pa nos bira konsumidónan konsiente i kritiko, ku ta para pa nan derecho.
Den mesun rosea nos ta hasi un yamada na tur komersiante pa tene bon kuenta ku e periodo di vensementu riba e ‘cadeaubon’. E periodo NO por ta ménos ku 1 aña.
Pa mas infromashon por tuma kontakto ku Fundashon pa Konsumidó na +5999462 6666 òf via di e-mail info@fundashonpakonsumido.cw
