Fundashon Pa Konsumidó a risibí den último tempu algun keho di konsumidónan tokante nan plan di seguro. Esaki tabata motibu pa Fundashon pa Konsumidó bishita algun kompania di seguro pa risibí mas informashon i klaridat riba algun produkto ku ta wòrdu ofresé na konsumidónan pa asina na nos turno por duna konseho na un manera korekto na e konsumidó. Ta trata di Seguro di entiero i Seguro di bida.
Seguro di entiero
Un seguro di entiero ta un tipo di seguro diseñá pa kubri gastunan relashoná ku un entiero. Un persona ta sera un seguro di entiero pa un suma akordá ku e kompania di seguro. Na momento ku e asegurado fayesé e montante ku el a akordá pe lo wòrdu pagá na e benefisiario òf na agensia funerario pa kubri tur gastu di entiero. Pues seguro di entiero ta diseñá spesífikamente pa evitá ku e famia ta keda ku un karga finansiero grandi den nan momento di tristesa.
Seguro di bida
Por skohe entre diferente tipo di seguro di bida, dependiendo di e nesesidat.
- Seguro di bida ku ta paga e suma akordá na momento ku e asegurado kumpli e edat akordá ku e kompania di seguro.
- Seguro di bida ku ta ofresé protekshon finansiero na e benefisiario ora e asegurado fayesé pues un seguro di bida no ta diseñá pa kubri gastunan di entiero.
Un konsumidó por skohe pa tur dos seguro tambe. Tantu pa seguro di entiero komo seguro di bida.Na momento di sera un seguro, ta pidi e asegurado pa yena un deklarashon di su salú di akuerdo ku bèrdat.
Fundashon pa konsumidó ta avisá pa pone hopi atenshon na momento ku ta yena e deklarashon i kontrolá bon si tur informashon ta kuadra ku bèrdat. Esaki ta hopi importante. Un deklarashon di salú ku no ta yená segun bèrdat ta trese difikultat na momento di hasi pago pa e suma sigurá.
Kon un konsumidó sa kua seguro ta esun ku e mester?
Fundashon Pa Konsumidó ta rekomendá pa kombersá ku e agente di seguro i splika kiko ta bo deseonan. Bishitá e diferente kompanianan di seguro pa por skohe un plan ku ta kuadra ku bo deseo i nesesidat. Na Kòrsou nos tin diferente kompania di seguro. Eskoho di un seguro no ta basá solamente riba e montante ku bo ta bai paga mensual òf e montante ku sea abo òf e benefisiario lo risibí, pero un seguro tei pa brindabo seguridat.
Tin algun pregunta ku por yudabu tuma un desishon konsiente i responsabel.
- Tin restrikshon segun edat òf estado di salú pa aseptá kliente?
- Tin eksklushon (por ehèmpel si tin sierto malesa òf riesgo)?
- Kiko ta pasa si kliente ta atrasá ku pago?
- Ki situashon ta kai bou di e kobertura di e pólisa?
- Verifiká si mester warda un tempu promé ke e seguro drenta na vigor (waiting period)
Pa finalisá Fundashon pa Konsumidó ta enfatisá pa nunka firma un pólisa sin ku bo a lesa i komprondé esaki. Si bo no a komprondé e pólisa puntra e agente di seguro pa bolbe splika e kondishonnan. Si ainda bo tin duda, bai kas ku e pólisa i sinta lesa esaki trankil òf laga un tersera persona ku tin saber di esaki splika kiko bo ta bai firma. Nunka sinti bo obligá pa firma un pólisa si bo no ta di akuerdo ku e kondishonnan.
Fundashon pa Konsumidó ta spera ku e informashon aki ta hasi konsumidónan mas konsiente di nan deber i derechinan ora ta sera un seguro. Tene kuenta ku seguro ta pa hopi aña. Pues unabes bo komprometé bo mes ku un seguro, mester keda kumpli fielmente ku e kondishonnan!
Fundashon pa Konsumidó ta gradisí tur e kompanianan di seguro ku a duna nan balioso kolaborashon na e proyekto aki.
Pa mas informashon por tuma kontakto ku Fundashon pa Konsumidó na number di telefon
(+5999) 462-6666 òf por manda nos un mail na info@fundashonpakonsumido.cw.
