Fundashon pa Konsumidó (FPK) ta informá ku últimamente FPK a nota un oumento signifikante di keho di konsumidó relashoná ku deskonekshon di suministro di awa i/òf koriente pa motibu di manipulashon di e meternan instalá na e propiedat. Mirando e kantidat di kehonan, FPK a aserká Aqualectra pa asina nos haña un splikashon riba e problemátiko aki.
Manipulashon òf interferensia no outorisá riba un meter di awa òf koriente ta wòrdu konsiderá un akto ilegal i esaki ta resultá den but. E montante di e but ku bo ta risibí, ta wòrdu kalkulá basá riba e tipo di manipulashon ku Aqualectra a konstatá na e meter. Aparte di e but, Aqualectra ta kobra tambe e uso no registrá di 2 aña.
Di akuerdo ku normanan vigente, e persona ku ta registrá na Aqualectra komo usuario ta esun responsabel pa e kondishon di e meter di awa i koriente instalá na e adrès.
Falta di konosementu no ta ekskluí responsabilidat.
Fundashon pa Konsumidó ta konsehá pa:
- Promé ku hür òf kumpra un propiedat ku tin instalashon di awa òf koriente, ta rekomendabel pa e futuro usuario pidi Aqualectra pa hasi un inspekshon tékniko di e meternan; i emití un deklarashon ku e meter no ta manipulá, ta funshoná konforme spesifikashon tékniko, i ku no tin iregularidat registrá.
- Pidi Aqualectra bin kontrolá bo meter di koriente òf awa si bo mira ku bo uso a baha kompará ku loke bo sa usa normal sin ku tabatin ningun kambio na bo kas
- Si bo no sa ku bo meter di koriente òf awa ta bieu òf ku e seyo a frusa òf bo tin kualke duda den e estado di e meter, pidi Aqualectra bin revisá bo meter. Esaki ta pa evitá ku e situashon por mustra manera ku tabatin manipulashon òf daño intenshonal na e meter òf seyo.
- Ta rekomendabel pa e persona ku ta hür su kas òf edifisio, pasa tur derecho di uso di awa i koriente riba nòmber di e hürdó.
Pa mas informashon i tep tokante e tópiko aki por tuma kontakto libramente ku Fundashon pa Konsumidó na number di telefòn +5999 462 6666 òf via di e-mail info@fundashonpakonsumido.cw.
Fundashon pa Konsumidó
Protehá derecho, promové transparensia i fortalesé konfiansa den merkado di servisio esensial na Kòrsou.
