Temporada di Kuaresma i spesialmente den siman santu nos pueblo tin e kustumber di kushiná kuminda di laman. Ta p’esei Fundashon pa Konsumidó ta haña importante pa hasi e anotashon di preis aki i informá e konsumidó na unda ta kumbiní mas pa kumpra.
E anotashon di preis aki a tuma lugá den e periodo di 11 te ku 16 mart 2026 den koperashon ku Ministerio di Desaroyo Ekonómiko (MEO). E anotashon di preis aki tabata basá riba 138 produkto den e makutu pre-selektá di kuaresma. Algun dje produktonan den e makutu pre selektá aki ta: tuna den bleki, sardinchi, diferente sorto di piská, berdura na bleki. Pa e anotashon aki Fundashon pa Konsumidó a bishitá 15 establesimentu. Esnan ku nos a bishitá ta: Arco Iris, Artis, Best Buy, Bon Bini, Boulevard, Carrefour, Centrum Mahaai i Piscadera, Esperamos, Luna Park, Mangusa Rio, Mangusa Hyper, New California, Timmy i Vreugdenhill.
Analisando e anotashon di preis, nos por a tuma nota di algun diferensia grandi espesialmente den preisnan di produktonan di laman. Na Esperamos 1 kg di Karko ta kosta cg.36.99 i na New California esaki ta kosta cg.59.95. Otro diferensia notabel ku nos a konstatá ta ku na Boulevard 1kg di filèt di Salmou ta kosta cg.32.95 i na New California esaki ta kosta cg. 49.95.
Apesar di e diferensianan grandi den preisnan, manera ya bo a kustumbrá, Fundashon pa Konsumidó a saka e tòp 3 di e supermerkadonan mihó surti i e supermerkado ku e mihó preis den e makutu pre-selektá. Pa mas informashon di e anotashon di preis di e makutu di Kuaresma, por chèk nos wèpsait www.fundashonpakonsumido.cw. Aki bo por analisá i kompará e preisnan segun bo supermerkadonan faborito i asina traha bo lista di kompra i skohe unda ta kumbiní abo pa kumpra bo kuminda di laman. PV-Kuaresma-maart-2026
E tòp 3 di supermerkadonan mihó surti na e okashon aki ta:
- Mangusa Hyper ku 111 produkto di e 138 produktonan di e makutu pre-selektá.
- Bon Bini supermarket ku 108 produkto
- New California ku 92 produkto
E tòp 3 supermerkadonan ku e mihó preis di e makutu pre-selektá na e okashon aki ta:
- Mangusa Hyper ku 44 produkto
- Bon Bini Supermarket ku 41 produkto
- Mangusa Rio ku 31 produkto
Durante di e komparashon di preis aki no a tene kuenta ku kalidat ni pais di importashon di e produktonan.
Aparte di e lista di preis di nos makutu pre-selektá pa temporada di Kuaresma, Fundashon pa Konsumidó ta kompartí algun tep ku ta yudabo determiná si un piská ta fresku:
- E piska su skama mester ta lombra
- Un piska ku no a wòrdu di vris, su ‘karni’ ta lombra i
- Ora bo primi e piská ku un dede, e ‘karni’ ta bini mes ora bèk su lugá
- Un piska fresku su wowo ta hèlder, bòl i no dòf
- Un piská fresku ta hole laman
Un danki special na GMN pa e tepnan balioso aki i tambe na MEO pa nan koperashon ku anotashon di preis. Pa kualkier remarke òf informashon por tuma kontakto ku nos semper na 462-6666 òf manda nos un e-mail na info@fundashonpakonsumido.cw.
