Vários tienda na Hulanda i Bèlgika a skohe pa stòp ku benta di e popular ko’i hunga pa mucha yamá “Squishy Dumplings”. E desishon aki a ser tumá despues ku resultadonan di un investigashon a mustra ku algun di e produktonan por kontené supstansianan kímiko ku por ta dañino pa salú.
Het Laatste Nieuws (HLN) na Bèlgika resientemente a laga tèst un kantidat di “Squishy Dumplings” dor di profesor i toksikólogo di KU Leuven, Jan Tytgat. Huntu ku su ekipo, profesor Tytgat a investigá tantu e holó komo e material ku a usa pa traha e squishynan.
Nos análisis ta mustra ku tin supstansianan ku potensialmente por ta kanseroso. Durante análisis di laboratorio a haña pidanan di diferente sustansianan kímiko ku, den kaso di kontakto largu i intensivo, por ta un riesgo pa salú. Entre nan tin xyleen, benzeen i naftaleen; tur e supstansianan aki ta derivá for di petroli,” asina Tytgat a deklará den un entrevista anterior ku Het Laatste Nieuws (HLN) na Bèlgika. Segun e profesor Tytgat, esaki tambe ta splika e holó fuerte manera petroli ku hopi di e Squishy Dumplings ta saka.
E toxicólogo a sigui deklará den e mes artíkulo ku e tipo di sustansianan aki no ta bon, spesialmente pa mucha. “Nan por kousa doló di kabes, mareo, gana di saka, i problema ku konsentrashon. Tambe por tin iritashon na pulmonnan, pasombra e sustansianan por drenta den aire ku bo ta inhalá.
A.I. & E. (EDCO) na Hulanda tambe ta atvertí tokante vários produkto di squish i strètch di Eddy Toys. E produktonan por kontené asbèst, un material peligroso ku por kousa problemanan serio di salú ora e ser inhalá.
Ta trata di e siguiente produkto nan:
- Stretch toy ku number di seri 8711252322247;
- Stretch car ku number di seri 8711252335667;
- Squish fish ku number di seri 8711252351513;
- Squish & stretch dog ku number di seri 8711252351421;
- Elastikorps stressball ku number di seri 8052532633098.
Nan ta indiká pa no kumpra e produktonan aki. Ku e resultadonan aki e outoridatnan kompetente awor ta investigá si e produktonan ta kumpli ku tur norma di seguridat ku ta bálido den Union Europeo. Komo medida di prekoushon, diferente komersiante a disidí pa saka e produktonan for di nan rèki te ora ku tin mas klaridat tokante seguridat di e produkto.
Konsumidónan ku a kumpra e produkto aki ta ser konsehá pa tene kuenta, spesialmente si e produkto tin un holó fuerte di kímiko òf petroli. Mayornan mester sigui e informashon ofisial ku ta sali for di e fuentenan kompetente. E instansianan di supervishon ta sigui ku un investigashon pa determiná si e produkto aki ta kumpli ku e eksigensianan di seguridat. Si e investigashon ta indiká ku e produktonan no ta kumpli ku e reglanan, por tuma medidanan adishonal, manera un akshon ofisial pa retirá e produktonan for di merkado. Fundashon pa Konsumidó ta sigui ku hopi atenshon e desaroyonan internashonal tokante e asuntu aki.
Te ainda, no tin ningun indikashon ofisial ku e produkto ta den proseso di retiro na Kòrsou. Konsumidónan ta ser konsehá pa keda na altura di informashonnan ofisial i usa prekoushon ora di usa e produkto. Seguridat di konsumidónan, i spesialmente di muchanan, ta keda e prioridat prinsipal di Fundashon pa Konsumidó.
Fuente: Informashon di Nederlandse Voedsel- en Warenautoriteit (NVWA.), Medionan di komunikashon na Bèlgika (HLN) Investigashon di KU Leuven na Bèlgika
