Fundashon pa Konsumidó ta hasi anotashon di preis na diferente establesimentu pa asina publiká esaki. E meta prinsipal ta pa informá e konsumidó unda tin e mihó surtido di produkto i tambe e mihó preis pa asina e konsumidó por hasi un eskoho responsabel na momento di hasi su kompra.
Despues di a publiká nos anotashon di preis riba karni, belèg, fruta i berdura, Fundashon pa Konsumidó ta publiká awe e anotashon di preis riba algun produkto di primera nesesidat.Nos a bishita un kantidat di 15 establesimentu i a hasi anotashon di 142 produkto.E 15 establesimentunan aki ta: Van den Tweel, Arco Iris, Best Buy, Bon Bini, Boulevard market Place, Centrum Mahaai, Centrum Piscadera, Carrefour, Timmy, Esperamos, Mangusa Rio, Mangusa Hypermarket, Ruyterkade, Vreugdenhil i Luna Park.
E anotashon di preis aki a tuma lugá di 13 te ku 17 aprel 2026 i manera ta kustumber Fundashon pa Konsumidó a kompará produktonan a base di marka i kontenido.
E supermerkado ku mas produkto na un mihó preis for di e makutu pre-selektá aki a resultá di ta Bon Bini supermarket ku 41 produkto, na di dos lugá Mangusa Rio i Mangusa Hyper ku 33 produkto. Centrum Piscadera i Centrum Mahaai ta na di 3 lugá ku 19 produkto.
E supermerkado mihó surti a resultá di ta Mangusa Rio i Mangusa Hyper ku 121 produkto. Na di 2 lugá Bon Bini ku 120 produkto i na di 3 lugá Esperamos Supermarket ku 108 produkto.
E makutu pre selektá aki ta basá riba produktonan di alimentashon i ta varia di aros, hariña, bonchi, suku, zeta, kòfi, te, lechi i limonada. Tambe tin produktonan di uso personal manera habon pa baña, pasta di djente, toaya femenino i papel di wc. Pa limpiesa di kas, Fundashon a anotá preis di entre otro: habon pa laba tayó, desinfektante i blich.
Resultado di e anotashon di preis
Despues di a analisá e lista di anotashon di preis, Fundashon pa Konsumidó por a tuma nota di un diferensia di preis entre supermerkadonan ku ta varia di cg 0.01 te ku cg 12,-. Fundashon pa Konsumidó ta konsehá tur konsumidó pa konsulta e lista promé ku nan bai hasi kompra. E diferensia di mas grandi tabata hariña di pan di marka Gold Medal (all purpose) di 12lbs, esaki ta kosta cg 20.65 na Bon Bini i na Boulevard esaki ta kosta cg 32.65. Tambe nos a tuma nota ku e mes un marka di hariña di pan Gold Medal (all purpose) di 5 lbs ta kosta cg 9.95 na Best Buy i na Centrum Piscadera i Centrum Mahaai esaki ta kosta 18.70, pues un diferensia di cg 8.12.
Pa fasilitá i pa informá nos konsumidónan mas mihó, Fundashon pa Konsumidó a pone tur e 142 produktonan di nos makutu di supermerkado den un tabèl, ya asina kada konsumidó por tin un bista mas amplio na kua supermerkado ta mas kumbiniente pa e hasi su kompranan. Tur interesado ku kier haña kopia di e tabèlnan aki por tuma kontakto ku ofisina di Fundashon pa Konsumidó na telefòn: 462-6666 òf via e-mail: info@fundashonpakonsumido.cw.
Por wak e tabèlnan aki: PV superm & minim. levensmiddelen april 2026
