Ku regularidat Fundashon pa Konsumidó ta hasi diferente anotashon di preis, esaki ta ku e meta pa tur nos konsumidónan ta na altura di kiko ta e preisnan di e diferente produktonan ku tin riba nos merkado. E biaha aki nos a anotá preis di material pa konstrukshon.
Di 7 te ku 18 mei nos a bishitá 6 diferente establesimentu i a hasi anotashon di preis riba 134 material pa konstrukshon.
E establesimentunan kaminda nos a hasi anotashon di preis ta Kooyman Group, Gomez Enterprises, Ferreteria Schèrpènè, Dijtham , Building Depot i Staal Antillen.
Ta bon pa enfatisá ku Fundashon pa Konsumidó durante di nos anotashon di preis no ta tene kuenta ku pais di orígen, marka ni kalidat di produkto.
Despues di a analisá resultadonan di e anotashon di preis di material pa konstrukshon, Fundashon pa Konsumidó a konstatá ku Kooyman Group ta e establesementu mas mihó surtí ku 116 material. Na di dos lugá a resultá Building Depot ku 85 material i na di tres lugá Gomez Enterprises ku 55 material for di e totalidat.
Aparte di e análisis ariba menshoná, Fundashon pa Konsumidó a kompará e preisnan di 2026 ku esnan di 2025. For di e análisis nos por a tuma nota di tantu subida komo bahada den e preisnan di e materialnan. Por ehèmpel, na Kooyman Group tabata tin kantidat di 49 material pa konstrukshon ku a subi di preis miéntras ku 17 a baha di preis. Na Building Depot nos a nota ku 47 material pa konstrukshon a subi di preis, miéntras ku 9 a baha di preis i na Staal Antillen 21 material a subi di preis i alabes 10 material a baha di preis.
Nos ta yegando e temporada kaminda nos por spera mal tempu, p’esei nos mester ta prepará. Áwaseru i bientu fuerte por okashoná daño na bo kas, pues no warda te na último momento pa hasi reparashon.
Nos ta rekomendá tur konsumidó ku tin ku hasi reparashon na nan dak òf kurpa di kas, pa konsultá e lista di preis pa por haña un mihó bista di e preisnan di diferente materialnan pa konstrukshon. Promé ku bo hasi kompra ta rekomendabel traha un presupuesto i hasi bo propio komparashon.
Den e temporada aki tambe ta sumamente importante pa bo mantené bo mes bon informá pa asina bo sa kon ta e mihó manera pa bo prepará. Riba nos wèpsait fundashonpakonsumido.cw tin informashon dirigí riba e preparashon pa kalamidat pa asina abo por prepará di forma konsiente.
Pa kualkier pregunta òf mas informashon, semper por tuma kontakto ku Fundashon pa Konsumidó na telefòn 4626666 òf e-mail nos na info@fundashonpakonsumido.cw
