Último tempu konstantemente Fundashon pa Konsumidó ta wòrdu aserká ku diferente pregunta tokante oportunidatnan di negoshinan i “invershonnan” ku ta primintí ganashi rápido, pero ku ta eksigí di miembronan pa rekultá otro personanan pa por progresá den e sistema.
E tipo di konstrukshonnan aki ta konosí komo ‘Pyramid Schemes’.
Un ‘Pyramid Scheme’ ta un sistema kaminda e enfoke prinsipal no ta riba benta di un produkto òf servisio legítimo, sino riba rekultá miembronan nobo. Na momento ku un miembro rekultá un miembro nobo e ta subi di puesto i e sèn ku e miembro nobo a invertí ta sirbi pa paga esnan ku a invertí promé. E sistema aki no ta unu sostenibel i na final, mayoria di miembro ta pèrdè nan sèn.
‘Pyramid Scheme’ hopi bia ta presentá nan mes komo un oportunidat hopi atraktivo, spesialmente ora nan ta ofresé promesanan di rikesa rápido. Sin embargo, si un oportunidat ta parse demasiado bon pa ta bèrdat, hopi biaha esaki no ta bèrdat.
Kon pa rekonosé un ‘Pyramid Scheme’?
Ta importante pa konsumidónan ta alerta si un oportunidat di negoshi:
- Ta primintí ganashi grandi ku poko esfuerso òf den un tempu hopi kòrtiku;
- Ta pone mas enfoke riba rekultá miembro nobo i no riba benta di produkto òf servisio;
- Ta eksigí un invershon promé ku partisipá;
- Ta primintí ku lo bo bira finansieramente liber solamente si bo sigui rekultá miembro nobo;
- Ta preshoná bo pa tuma un desishon lihé òf bisa ku e oportunidat lo kaba pronto;
- No ta kla tokante kon e kompensashon realmente ta funshoná.
Si bo ta sospechá òf ta na altura di ‘Pyramid Schemes’ aki na Kòrsou (i St.Maarten) Fundashon pa Konsumidó ta urgí bo pa raportá esaki inmediatamente na Centrale Bank van Curacao en St.Maarten via e-mail info@centralbank.cw.
Si ya bo ta partisipando den un “Pymarid scheme’ kaba ta konsehabel pa:
- Stòp di invertí bo sèn den e empresa;
- No sigui rekultá miembro nobo;
- Warda tur dokumento, faktura, resibu i komunikashon ku e empresa;
- Kanselá bo partisipashon segun e kondishonnan di e empresa.
Fundashon pa Konsumidó ke atvertí tur konsumidó pa sea alertá pa e tipo di práktikanan finansiero froudulento aki, hasi investigashon di e empresa promé ku bo tuma riesgonan i no laga ningun persona preshoná bo pa hasi un invershon. Kòrda ku bo pòtmòni ta bo responsabilidat!
