Na komienso di kada aña eskolar nos muchanan mester di diferente artíkulo nobo pa bai skol kuné. Fundashon pa Konsumidó semper ta enfoká riba e importansia pa hasi kompra na un manera konsiente i sabí. P’esei tur aña di nobo nos ta hasi anotashon di preis riba artíkulonan di skol.
Den e temporada di 6 pa 8 di Yüli Fundashon pa Konsumidó konhuntamente ku Ministerio di Desaroyo Ekonómiko (MEO), a hasi anotashon di preis na un total di 11 establesimentu. E establesimentunan ku a forma parti di e anotashon di preis aki ta: La Curaçao Zeelandia, Curaçao Office Supply, Mensing’s Caminada, Bruna, Office System, Casa Cesar, Home Plus, Samsom, Martis Agencies, Señor Barata i Building Depot.
Fundashon pa Konsumidó a skohe 63 artíkulo di skol ku ta wòrdu mas uzá di kual a hasi anotashon di preis na tur e establesimentunan menshoná. Mester enfatisá ku preisnan pa artíkulonan di skol no ta kai bou di un preis máksimo stipulá pa gobièrnu di Kòrsou, esaki ta pone ku kada negoshante ta liber pa pone su mes preis. Den e anotashon aki no a hasi un komparashon di preis. Back 2 School 2026
For di nos anotashon di preis e tòp tres establesimentunan ku a resultá mihó surtí ta:
- Bruna ku 59 artíkulo
- Mensing’s Caminada ku 58 artíkulo.
- Casa Cesar ku 52 artíkulo
Fundashon pa Konsumidó a tuma nota di un kantidat di markanan di artíkulonan pa skol disponibel na e diferente establesimentunan. Mester tene kuenta ku esaki, komo ku e artíkulonan ta bini for di diferente destinashon i esaki tin su influensia riba e preisnan. Tur e variashon di markanan aki ta brinda e posibilidat pa konsumidónan por hasi nan eskoho konsientemente. E lista di tur establesimentunan, artíkulonan disponibel i nan preis ta visibel riba nos wèpsait www.fundashonpakonsumido.cw. Esaki sigur ta hasi e proseso di búskeda di artíkulonan pa skol na un preis kumbiniente mas fásil pa tur mayor i sobra konsumidónan.
Pa finalisá Fundashon pa Konsumidó ta deseá tur alumno un aña eskolar sumamente eksitoso, kaminda disiplina i trabou duru ta e base pa alkansá e meta deseá.
