Fundashon pa Konsumidó ta hasi anotashon di preis na diferente establesimentu pa asina publiká esaki. E meta prinsipal ta pa informá e konsumidó unda tin e mihó surtido di produkto i tambe e mihó preis pa asina e konsumidó por hasi un eskoho responsabel na momento di hasi su kompra.
Nos a bishita un kantidat di 14 establesimentu i a hasi anotashon di 241 produkto. E 14 establesimentunan aki ta: Van den Tweel, Best Buy, Bon Bini, Boulevard market Place, Centrum Mahaai, Centrum Piscadera, Carrefour, Timmy, Esperamos, Mangusa Rio, Mangusa Hypermarket, Ruyterkade, Vreugdenhil i Luna Park. E anotashon di preis aki a tuma lugá di 25 te ku 28 yüli 2026 i manera ta kustumber Fundashon pa Konsumidó a kompará produktonan a base di marka i kontenido.
E supermerkado ku mas produkto na un mihó preis for di e makutu pre-selektá aki a resultá di ta Mangusa Rio i Mangusa Hyper ku 74 produkto, na di dos lugá Bon Bini supermarket ku 63 produkto. Centrum Piscadera i Centrum Mahaai ta na di 3 lugá ku 52 produkto.
E makutu pre selektá aki ta basá riba produktonan di alimentashon i ta varia di karni, fruta bèrdura, belèg,aros, hariña, bonchi, suku, zeta, kòfi, te, lechi i limonada. Tambe tin produktonan di uso personal manera habon pa baña, pasta di djente, toaya femenino i papel di wc. Pa limpiesa di kas, Fundashon a anotá preis di entre otro: habon pa laba tayó, desinfektante i blich.
Resultado di e anotashon di preis
Despues di a analisá e lista di anotashon di preis, Fundashon pa Konsumidó por a tuma nota di un diferensia grandi di preis den kategoria di karni cg 16.45, belèg cg 30,- i bèrdura cg 13.46.
Pa fasilitá i pa informá nos konsumidónan mas mihó, Fundashon pa Konsumidó a pone tur e 241 produktonan di nos makutu di supermerkado den un tabèl, ya asina kada konsumidó por tin un bista mas amplio na kua supermerkado ta mas kumbiniente pa e hasi su kompranan. Tur interesado ku kier haña kopia di e tabèlnan aki por tuma kontakto ku ofisina di Fundashon pa Konsumidó na telefòn: 462-6666 òf via e-mail: info@fundashonpakonsumido.cw. PV superm & minim. eerste levensmiddelen aug 2026
Por wak e tabèlnan tambe riba nos wèpsait: www.fundashonpakonsumido.cw.
