Fundashon pa Konsumidó durante e periodo di 30 mei te ku 5 yüni a bishitá 15 diferente establesimentu pa anotá preis di un kantidat di 94 produkto den e kategorianan: karni, fruta i berdura. E 15 diferente establesimentunan aki ta: Van den Tweel, Arco Iris, Best Buy, Bon Bini, Boulevard market Place, Centrum Mahaai, Centrum Piscadera, Carrefour, Timmy, Esperamos, Mangusa Rio, Mangusa Hypermarket, Ruyterkade, Vreugdenhi i Luna Park. Meta di e anotashon di preis aki ta pa konsientisá i fasilitá nos konsumidónan den nan proseso di kompra. P’esei Fundashon pa Konsumidó ta brinda un lista di preis ku ta duna e konsumidó un mihó bista di kua produkto ta optenibel na unda, kuantu nan ta kosta na kada establesimentu i tambe e diferensianan di preis di kada produkto na e diferente establesimentunan ariba menshoná.
Mangusa Hyper tin mas produkto di karni, belèg, fruta i bèrdura na mihó preis
Di akuerdo ku e lista di anotashon di preis ku Fundashon pa Konsumidó a traha, Mangusa Hypermarket a resultá e supermerkadonan ku mas produkto na mihó preis. A konstatá ku na e supermerkado ta tin un kantidat di 27 produkto na mihó preis for di e lista di e 94 produktonan den e makutu pre selektá ku a hasi anotashon di dje.
Centrum Mahaai i Centrum Piscadera i Mangusa Rio Canario a resultá na di dos lugá ku 25 produkto na un preis mas kumbiniente i Bon Bini a resultá na di tres lugá ku un kantidat di 15 produkto na un mihó preis.
Centrum Picadera i Centrum Mahaai a resultá e supermerkadonan ku mas karni na un mihó preis i Mangusa Hyper i Mangusa Rio a resulta e supermerkadonan ku mas berdura na un mihó preis for di e makutu pre-selektá .
Fundashon pa Konsumidó ta sugerí pa konsumidónan konsultá e lista di anotashon di preis promé ku bai hasi kompra. Ta bon pa menshoná ku diferensianan di preis por ta dependé di diferente faktor, entre otro marka di e produktonan, pais prosedente di importashon i kalidat di e produktonan. Fundashon pa Konsumidó ta partisipá ku nos no ta tene kuenta ku e faktornan aki den e komparashon di preis aki.
Kòrda kontrolá kiko bo tin promé ku bo traha bo lista di kompra
Esaki ta hopi importante pa evitá ku ta kumpra kos i gasta sèn innesesariamente. Fundashon pa Konsumidó ta invitá tur konsumidó pa subi nos website https://fundashonpakonsumido.cw/òf bishitá nos página di Facebook, https://www.facebook.com/fundashonpakonsumido, pa tuma nota di e lista di komparashon di preis di karni.
Tambe por hasi un petishon pa risibí e komparashon di preis via nos adrès elektróniko, info@fundashonpakonsumido.cw.
